Ua neej zoo li menyuam nyob qhov kaj

Efexaus 5:8-14  Kxh. Ntxoov Yias Vaj

 

Greetings:  Thov Vajtswv foom koob hmoov rau nej thiab thov Vajtswv txojkev hlub nrog nraim nej txhua tus nyob rau ntawm Tswv Yexus lub npe.  Asmees.

Text:  Efexaus 5:8

Thov Vajtswv:

 

1.       Introduction:
          a.       Nyob zoo cov kwvtij txhua tus!  Vajtswv Txojlus uas hnub no Kuv yuav qhuabqhia muaj lub npe hu haistias, “Ua lub neej zoo li cov menyuam nyob qhov kaj – Live as children of Light.”

 

          b.       Peb paub hastas yog peb tsis nyob ntawm qhov kaaj ces peb yog nyob ntawm qhov tsaus ntuj xwb.  Yeej tsis muaj leejtwg yuav nyob tau ob qhov chaw losyog yuav muaj ib qhov chaw nyob hauv plawv ntawm qhov kaj thiab qhov tsaus ntuj.

 

          c.       Tus neeg ua lub neej tsaus ntuj, nws tsis pom kev.  Nws tsis pom qhov tseeb.  Nws tsis pom tom hauv ntej.  Thaum phau Vajluskub hais txog kev tsaus ntuj losyog haujlwm tsaus ntuj, nws yog hais txog yam haujlwm uas phem, kev txhaum thiab txhua yam uas tsis haum Vajtswv siab.  Vajtswv tsis xav kom peb ua neej zoo li cov neeg nyob hauv qhov tsaus ntuj, tiamsis Vajtswv cov neeg yuav tau ua neej zoo li cov neeg nyob qhov kaj los yog qhov pom kev, vim haistias peb yog lub teeb pom kev (qhov kaj losyog qhov pom kev) cov menyuam. 

 

2.       Ua lub neej nyob qhov kaj:
          a.       Vajtswv Txojlus ntuas kom peb txhua tus ua peb lub neej zoo li cov menyuam ntawm qhov kaj losyog ntawm qhov pom kev.  Peb yog qhov kaj thiab qhov pom kev cov menyuam.  Peb lub neej yuav tsum txi cov txiv phim qhov peb yog cov menyuam ntawd. 

 

          b.       Lub neej uas yog qhov kaj losyog qhov pom kev cov menyuam ua yog ua txhua yam zoo, ua txhua yam ncajncees, ua txhua yam nrog qhov tseeb, thiab xav nrhiav txhua yam uas haum tus Tswv lub siab xwb.

 

          c.       Lub neej nyob ntawm qhov kaj losyog qhov pom kev yeej tsis muaj dejnum tsaus ntuj ib zaug li.  Qhov no txhais tau haistias nws yeej tsis ua lub neej phem, tsis ua kev txhaum thiab tsis ua yam uas tsis haum Vajtswv siab ib zaug li.  Tiamsis nws tseem yuav muab tej dejnum phem zoo li no nthuav rau ntawm qhov pom kev kom txhua yam zoo huvsi.  Yog li no, Vajtswv ntuas kom Vajtswv cov neeg txhua tus yuav tsum tsim tsis txhob pw tsaug zog es cia Tswv Yexus ua lub teeb ci tuaj rau kom sawvdaws pom kev ua neej.

 

3.       Xaus lus:
          a.       Cov kwvtij txhua tus, Vajtswv hlub peb kawg li, Nws thiaj tau txib Tswv Yexus los tuag txhiv peb lub txim thiab coj peb rov los ua Nws cov menyuam uas zoo kawg nkaus.  Nimno peb yog cov menyuam nyob ntawm qhov kaj losyog nyob ntawm qhov pom kev.  Tswv Yexus yog qhov pom kev ntawd.  Peb yuav tau cia Tswv Yexus niaj hnub ci tuaj rau peb kom peb pom kev ua peb lub neej hauv lub ntiajteb uas tsaus ntuj nti no.

 

          b.       Qhov no txhais haistias peb yuav tau cia Tswv Yexus tej lus qhia peb ua neej.  Peb yuav tau kawm Vajtswv Txojlus.  Thaum peb kawm Vajtswv Txojlus peb yuav txawj cia Tswv Yexus ua tus Tswv kav peb lub siab lub ntsws thiab txhua yam uas peb ua thiab hais peb thiaj tsis ua kev txhaum losyog ua dejnum tsaus ntuj uas tsis haum Vajtswv siab.  Yog thaum twg Tswv Yexus tsis yog tus ci rau koj lawm, koj lub neej yeej yuav tsaus ntuj xwb xwb li, rau qhov Tswv Yexus tibleeg nkaus thiaj yog qhov kaj losyog lub teeb pom kev rau hauv lub ntiajteb no.  Tamsim no Tswv Yexus nrog nraim peb nyob.  Vajtswv Txojlus haistias Tswv Yexus nrog txhua tus ntseeg kom ib txogsia.  Yog li, nco ntsoov haistias Tswv Yexus yog koj tus Cawmseej thiab cia Nws qhia tej lus qhia koj ua neej xwb koj thiaj ua tau lub neej nyob ntawm qhov kaj losyog qhov pom kev, vim haistias Nws tus yog coj koj thiab qhia koj ua neej.

 

          c.       Thov Vajtswv foom koob hmoov rau nej txhua tus, thiab thov kom Vajtswv Txojlus yuav tiav rau ntawm nej lub neej rau ntawm Tswv Yexus lub npe.  Asmees.