Niamtxiv Kev Sib Raug Zoo

Efexaus 5:21-33 (6/11/2005)

Greetings: Thov Vajtswv foom koobhmoov rau nej, thiab thov Tswv Yexus txojkev hlub nrog nraim nej txhua tus nyob. Asmees.

Text: Efexaus 5:22,23,25

Prayer:

1. Introduction:
a. __________, peb nrog neb zoo siab kawg nkaus uas Vajtswv Ntuj tau coj neb los sib sau ua ua txij ua nkawm losyog ua niamtxiv. Txojkev sib yuav yog ib yam koob hmoov zoo kawg nkaus uas Vajtswv tsim rau tibneeg ntiajteb.

b. Vajtswv Txojlus Txojlus qhia rau peb haistias Vajtswv yog tus tsim txojkev sib yuav rau tibneeg. Thaum Vajtswv coj ob tus neeg los uake, nkawd tsis yog obleeg lawm, tiamsis yog ibleeg. Nkawd yuav tau mloog Vajtswv, thiab ua neej raws li Vajtswv hais. Yog khub niamtxiv twg ua neej raws li Vajtswv Txojlus tau teev tseg khub niamtxiv ntawd lub neej yeej zoo thiab ua lub neej kaj siab lug.

c. Yog khub niamtxiv twg tsis ua neej raws li Vajtswv hais, khub niamtxiv ntawd yeej yuav muaj teebmeem thiab lub neej yeej tsis ruaj khov.

d. Peb pom haistias ntawm peb cov Hmoob losyog lwm haivneeg muaj kev sib nrauj heev thiab muaj tej khub niamtxiv ua neej tsis sib haum, niaj hnub nyuaj siab, vim lawv tsis ua neej raws li Vajtswv Txojlus. Thaum tus txivneej ua raws li nws lub siab xav, thiab tus pojniam ua raws li nws lub siab xav xwb, ces lub neej yeej yuav nyuaj thiab muaj teebmeem. Qhov kuv tsis yog hais kom neb ntshai, tiamsis yog hais qhov tseeb raws li Vajtswv Txojlus.

e. Hnub no Kuv yuav muab Vajtswv Txojlus qhia mentsis rau neb tau kawm thiab khaws coj mus ua neb lub neej uake tias Vajtswv Txojlus hais li cas txog txojkev sib yuav, tus pojniam yuav nrog nws tus txiv sib nraug zoo li cas, tus txiv yuav nrog nws tus pojniam sib nraug zoo li cas.

2. Tus pojniam yuav tsum submit (txo hwjchim) rau tus txiv:
a. Vajtswv Txojlus hais li no rau cov uas yog pojniam uas muaj txiv. Vajtswv Txojlus haistias, “Nej cov uas yog pojniam nej yuav tsum txo hwjchim (submit) rau nej cov txiv.” Lo lus haistias “txo hwjchim” no tsis yog txhais haistias tus pojniam yog tus qhev, losyog nws tsis muaj feem nyob hauv lub vaj lub tsev li. Tiamsis lub ntsiab lus tseeb ceeb yog Vajtswv Txojlus ntuas tus pojniam kom nws yuav tsum muab nws tus txiv saib zoo li nws lub taubhauv, nws yuav tau txo nws lub meejmom kom nqis dua nws tus txiv – ib yam li cov ntseeg Yexus cia Yexus yog lub taubhauv rau lawv, thiab lawv tsis muab lawv saib siab tshaj Tswv Yexus. Vajtswv Txojlus haistias Yexus yog cov ntseeg lub taubhauv. Nws hwj nws tus txiv. Nws muab tus txiv saib tseem ceeb heev rau nws lub neej. Cov ntseeg txo hwjchim rau Yexus. Lawv cia siab rau Yexus rau txhua yam hauv lawv lub neej. Ib yam nkaus li no, tus pojniam yuav tau txo hwjchim rau nws tus txiv. Thaum tus pojniam txawj nrog nws tus txiv sib raug zoo li no, lub neej yeej yuav zoo mus li.

b. Lub teebmeem tamsim no peb muaj ib cov pojniam Hmoob muaj yog lawv tsis txo hwjchim rau lawv cov txiv. Lawv haistias lawv muaj hwjchim ib yam li lawv cov txiv; lawv tsis txo hwjchim, thaum no nkawv yuav tsum muaj teebmeem, vim haistias cov pojniam no lawv tsis ua raws li Vajtswv Txojlus hais.

c. _____, koj nco ntsoov txo hwjchim rau koj tus txiv. Tsis txhob muab koj tus kheej saib sib luag koj tus txiv es yuav muab koj tus txiv saib tsis tseem ceeb. Tiamsis koj tsa nws cai, txhawb nws, hwm nws, thiab muab nws saib zoo li koj lub taubhau – ua qhov tseem ceeb heev rau koj lub neej. Qhov no thiaj raws li txojkev sib yuav Vajtswv tsim tseg.

3. Tus txiv yuav tsum hlub tus pojniam:
a. Zaum no kuv hais rau cov uas yog txiv uas muaj pojniam, tiamsis tshwjxeeb hnub no rau koj ____________. Vajtswv Txojlus hais li no rau cov uas yog txiv haistias, “Nej yuav tsum hlub nej cov pojniam ib yam li Yexus Khetos hlub cov ntseeg es Nws zoo siab hlo muab Nws txojsia los txhiv lawv.”

b. Cov niamtxiv hluas nimno mas nyiam hais lo lus haistias, “I love you.” Tiamsis lub neej ua niamtxiv mus tob thiab deb tshaj lo lus haistias, “I love you no.” Tibneeg America lawv niaj hnub hais I love you rau lawv tus txiv losyog tus pojniam, tiamsis tib pliag xwb cia li tsis sib haum thiab sib nrauj los kuj muaj. Tus txiv txojkev hlub nws pojniam yuav tsum yog nws zoo siab hlo muab nws txojsia los txhiv nws tus pojniam thiaj yog txojkev hlub tiag tiag. Nws zoo siab hlo yuav pab nws tus pojniam, txhawb nws tus pojniam thiab ua zoo rau nws tus pojniam rau txhua yam. Txawm yog nws yuav muab nws txojsia los tuag txhiv nws tus pojniam los nws yuav tsum zoo siab hlo. Txojkev hlub yeej tsis muaj ib qhov phem, tsis muaj lub siab phem, tiamsis tsuas muaj ua zoo mus tas sim neej li xwb. Vajtswv Txojlus hais kom tus txiv nrog nws tus pojniam sib nraug zoo li no.

c. Tamsim no peb cov Hmoob muaj ntau khub niamtxiv lub neej tsis zoo thiab puastsuaj tas vim yog tus txiv tsis muaj lub siab hlub tus pojniam thiab tus txiv tsis ua zoo rau nws tus pojniam. Thaum twg yog tus txiv tsis nrog nws tus pojniam sib raug zoo raws li Vajtswv Txojlus hais lawm, lub neej yeej yuav tsis zoo.

4. Closing:
a. _______, hnub neb los sib yuav rau ntawm Vajtswv lub npe, neb mloog Vajtswv cov lus. Neb khaws Vajtswv cov lus coj mus ua neb lub neej. Tus pojniam yuav tsum txo hwjchim rau nws tus txiv ib yam li cov ntseeg txo hwjchim rau Yexus, tus txiv yuav tsum hlub tus pojniam ib yam li Yexus hlub cov ntseeg.

b. Txojkev sib nraug zoo li no yog Vajtswv tsim tseg rau cov pojniam thiab txivneej uas tau los sib yuav ua niamtxiv lawm. Cov uas ua neej thiab sib nraug zoo raws li Vajtswv Txojlus hais yeej tau Vajtswv cov koob hmoov. Lub neej yeej zoo thiab yeej tau zoo nyob kaj siab lug.

c. Tsis tas li no xwb, neb nco ntsoov haistias Vajtswv yog tus tsim neb los nyob hauv lub ntiajteb no, thiab Nws yog tus coj neb los ua niamtxiv. Vajtswv hlub neb heev, Vajtswv twb zam neb lub txim dhau los ntawm qhov Yexus tuag saum tus ntoo khaublig lawm. Neb mloog Vajtswv lus, thiab neb cia siab rau Tswv Yexus, Vajtswv yuav foom koob hmoov rau neb lub neej, thiab neb lub neej thiaj yuav zoo raws li Vajtswv foom tseg rau txojkev sib yuav. Thov Vajtswv txojkev haumxeeb thiab kev hlub yuav los kav neb lub siab rau ntawm Yexus lub npe. Asmees.