Yexus kovyeej txojkev tuag lawm

John 20:1-18

Greetings: Thov Vajtswv foom koobhmoov rau nej txhua tus hnub no uas yog hnub peb tuaj uake hawm Vajtswv ua koobtsheej losyog celebration peb tus Cawmseej Yexus sawv hauv qhov tuag rov los. Thov Vajtswv txojkev haumxeeb thiab kev zoo siab nrog nej nyob. Asmees.

Text: John 20:1-2,9

Prayer:

1. Introduction:
a. Cov kwvtij txhua tus, muaj ib yam uas ua rau peb tibneeg ntiajteb quaj thiab los kuamuag tshajplaws yog txojkev ploj kev tuag. Txojkev tuag yog ib yam uas phem tshajplaws tshwmsim los rau tibneeg, tiamsis peb tsis muaj hwjchim yuav txwv tau txojkev tuag losyog yuav kovyeej txojkev tuag.

b. Peb cov uas tuaj hawm Vajtswv hnub no tsis hais tsevneeg twg peb txhua tus tau ntsib txojkev tuag. Peb muaj tej txhia niam thiab txiv tau tuag lawm, losyog txiv tuag tsegv niam, losyog niam tuag tseg txiv (Ntawm kuv thiab niam Xibhwb wb – wb obleeg tsis muaj txiv huvsi, vim peb obleeg txiv tau tuag huvsi mus lawm); tej txhia pogpawg tuag lawm; tej txhia menyuam tau tuag; tej txhia tus pojniam tuag losyog tus txiv tuag; peb tej txhia muaj kwvtij neejtsa phoojywg tuag thiab txheeb ze tuag. Peb txhua tus tau ntsib kev tuag. Txojkev tuag yog ib yam uas phem kawg nkaus tiag.

c. Peb yeej tsis muaj leejtwg xav tuag. Tiamsis ntawm peb tus kheej, peb ua tsis tau ib yam dabtsi los pab peb. Txawm yog tus txawj ntse tus ruam, tus siab tus qis, tus zoo nkauj zoo nraug tus tsis zoo nkauj tsis zoo nraug, tus rog tus yuag, tus neeg phem tus neeg zoo thiab txawm yog haivneeg twg thiab nyob lub tebchaws twg los peb sawvdaws hla tsis dhau txojkev tuag.

2. Why we died?
a. Yog vim li cas peb tibneeg ntiajteb txawm tuag? Vajtswv Txojlus nyob ntawm Chivkeeb tshooj 3 qhia rau peb haistias vim neeg tsis mloog Vajtswv lus, neeg tau mus noj tsob txiv ntoo txawj tuag.

b. Thaum Nkauj Iab thiab Nraug Oo nkawv mus noj tsob txiv ntoo txawj tuag lawm, nkawv lub cev uas Vajtswv tsim los nyob mus tas ibtxhis cia li txawj tuag. Nkawv lub cev tsis txawj tuag hloov mus lub cev txawj tuag. Nkawv tej menyuam los txawj tuag ib yam nkaus li nkawv. Peb yog nkawv cov menyuam, peb thiaj txawj tuag. Txojkev tuag no tsis yog tuag ntawm sab nqaijtawv xwb, tiamsis yog tuag ntawm sab ntsujplig huvsi. Yog li, txojkev tuag thiaj ua rau peb quaj kawg nkaus yog haistias peb tsis ntseeg Tswv Yexus. Tiamsis thaum peb ntseeg Tswv Yexus, peb tsis tuag ntawm sab ntsujplig lawm, peb thiaj muaj chaw cia siab. Hmoob haistias, “Yog tojroob hauvpes quas ces peb yuav sib pom dua, tiamsis yog av luaj quas (tuag lawm) ces peb yuav tsis sib pom ntxiv lawm.” Tiamsis Hmoob lo lus no hais tsis yog lawm. “Txawm yog tojroob hauvpes quas los peb yuav sib pom dua, txawm yog av quaj quas los peb yuav sib pom dua, vim haistias Vajtswv haistias peb yuav sib pom dua.”

c. Txij thaum neeg txawj tuag los neeg tau nrhiav ntau txojkev, ntau yam tshuaj thiab ntau lub tswvyim los cawm neeg txojsia kom neeg tsis txhob tuag, tiamsis los txog hnub no tsis muaj ib yam dabtsi pab tau. Neeg tseem niaj hnub tuag. Ntaub ntawv qhia rau peb haistias ib second twg 1.8 tus tibneeg tuag nyob hauv lub ntiajteb no. Ib second twg 4.3 tus tibneeg yug los. Yog li no, cov ciaj thiaj coob tshaj cov tuag. Tiamsis cov tsis ntseeg Tswv Yexus coob tshaj cov ntseeg Tswv Yexus.

3. Jesus’ resurrection is victory over death:

a. Puas yuav muaj leejtwg pab tau peb dim txojkev tuag? Muaj ib tug twb pab tau peb lawm, Nws yog Yexus Khetos! Hnub no yog hnub peb hawm Vajtswv ua koobtsheej haistias txojkev tuag tau swb Tswv Yexus lawm. Hnub no peb ua koobtsheej nco txog hnub uas Tswv Yexus sawv hauv Nws lub qhov tuag rov los muaj sia nyob. Txojkev tuag swb Tswv Yexus lawm. Txojkev tuag ua tsis tau rau Tswv Yexus tuag ib zaug ntxiv li lawm. Yog koj paub haistias muaj ib tus neeg muaj cov tshuaj peb noj tas es yuav ua rau peb nyob mus tas ibtxhis, koj puas yuav ua kom tau cov tshuaj ntawd. Kuv xav haistias koj yeej yuav khwv kom tau nyiaj mus yuav cov tshuaj ntawd. Cov kwvtij, Tswv Yexus yog cov tshuaj ntawd. Peb sawvdaws cia li zoo siab!

b. Vajtswv Txojlus 1 Kauleethaus 15 haistias Tswv Yexus yog thawj cov txiv (first fruit) uas sawv los ntawm txojkev tsaug zog uas yog txojkev tuag. Hnub no Vajtswv Txojlus qhia ntxiv rau peb haistias peb txhua tus yuav tsis tuag, tiamsis peb yuav sawv rov los ib yam nkaus li Tswv Yexus. Nyob lub sijhawm Vajluskub Qub, Vajtswv twb los qhia rau Yauj paub haistias cov neeg tuag rau ntawm Vajtswv lawv yuav sawv rov los muaj sia nyob. Txawm lub cev tuag lwj tas lawm los tus neeg yuav muaj dua cev tshiab los ntsib Vajtswv timtsej timmuag.

c. Hnub no Txoj Moo Zoo qhia rau peb haistias Tswv Yexus sawv hauv qhov tuag rov los lawm tiag tiag. Maivlig Madalees mus xyuas Yexus tom qab ntxav tiasmis nws tsis pom Yexus nyob hauv lub qhov ntxa. Maivliag rov los qhia rau Petus thiab cov thwjtim. Petus thiab Yauhas nkawv mus saib lub qhov ntxa, nkawv tsis pom Yexus nyob hauv lub qhov ntxa raws li Maivliag hais tiag.

d. Lub sijhawm no cov thwjtim lawv yeej tsis nkag siab los ntawm Vajluskub haistias Yexus yuav tsum sawv hauv qhov tuag rov los, tiamsis tom qab lawv pom tej no lawm lawv thiaj ntseeg haistias Yexus sawv los lawm tiag tiag. Thaum Petus thiab Yauhas nkawv rov mus lawm lawm. Maivliag rov mus saib lub qhov ntxa, nws pom ob tug timtswv zaum hauv. Nyob ntawm Malakaus 16, ob tug timtswv ntawd hais rau cov thwjtim haistias Yexus twb sawv hauv rov los lawm. Mathais 27 qhia rau peb haistias ob tug timtswv hais rau cov pojniam haistias Yexus tau sawv rov los muaj sia nyob lawm.

e. Txoj Moo Zoo hnub no qhia rau peb hasitias Maivliag Madalees mus sawv ze ntawm lub qhov txa quaj quaj. Thaum ntawd Tswv Yexus los ntsib Maivliag. Thaum ntej Maivlaig xav haistias ntshe Yexus yog tus tu lub vaj xwb, tiamsis thaum Yeuxs hais Maivlig lub npe, Maivliag thiaj tig pom tias yog Yexus tiag. Maivliag yuav zoo siab heev. Maivliag cev tes yuav mus tuav Yexus, tiamsis Yexus haistias, “Tsis txhob tuav kuv, rau qhov kuv tsis tau mus cuag Kuv Txiv.” Yexus hais rau Maivliag tias, “Koj cia li mus qhia kuv cov kwvtij tias Kuv yuav rov mus cuag Kuv Txiv thiab nej Txiv, Kuv tus Vajtswv thiab nej tus Vajtswv.” He stayed for 40 more days on earth before He went up to heaven, and yet He promised to be with the Christians until the end time.

4. Closing:
a. Cov kwvtij, Vajtswv Txojlus yeej qhia tseeb rau peb haistias Tswv Yexus tau sawv hauv qhov tuag rov los lawm tiag tiag. Tswv Yexus tau kovyeej txojkev tuag rau peb lawm. Peb ntseeg tau li no, rau qhov haistias cov thwjtim hauv Phau Vajluskub yog neeg tiag tiag - lawv tau pom Yexus rov muaj sia nyob lawm. Tshaj 500 leej neeg tau pom Yexus sawv los lawm tiag tiag. Xibhwb Povlauj los tau pom Tswv Yesxus ib yam nkaus. Cov neeg pom Tswv Yexus sawv rov los tau mus qhia Txoj Moo Zoo no rau ntau tus neeg, lawv mus qhia rau ntau lub tebchaws txog qhov Yexus sawv hauv qhov tuag rov los kovyeej txojkev tuag. Nimno peb ntseeg vim yog lawv cov lus!

b. Cov ntseeg li no tsis yog peb xwb, tiamsis muaj ze li 2 billions tus tibneeg hauv lub ntiajteb no ntseeg Phau Vajluskub haistias Tswv Yexus sawv hauv qhov tuag rov los tiag tiag. Cov kwvtij, hnub no yog ib hnub uas zoo siab heev rau peb thiab rau cov paub txog Tswv Yexus sawv los kovyeej txojkev tuag uas peb kov tsis yeej. Hnub no yog ib hnub peb yuav tsum celebrate tias txojkev tuag swb lawm.

c. Vajtswv Txojlus cog lus tseg rau peb txhua tus haistias txhua tus ntseeg Tswv Yexus lawv yuav sawv hauv lawv lub qhov tuag rov los tau txojsia ntev. Txawm yog lub cev no tuag los, lawv yuav tau lub cev tshiab. Yog haistias Tswv Yexus rov los ua ntej peb lub cev tuag, peb yeej tsis tuag. Peb yuav tau lub cev tshiab thiab txojsia ntev uas thaum chivkeeb Vajtswv tsim rau Adas thiab Evas nkawv.

d. Txojkev tuag tsis muaj taug lawm. Yog li, txawm peb tuag los peb yuav sawv rov los tau lub cev tshiab. Thaum peb muaj lub cev tshiab lawm, peb yuav nyob mus tas ibtxhis ib yam li Tswv Yesxus. Qhov no yog peb txojkev cia siab thiab peb kev vamkhom uas Vajswv muab rau peb. Yog li, peb tsis txhob ntshai kev tuag, vim peb muaj kev cia siab rau txojsia ntev rau ntawm Tswv Yexus yog qhov tseem ceeb. Peb yuav tau thov Vajtswv pab peb kom peb txojkev vamkhom no ciajsia nyob hauv peb mus txog hnub kawg uas Vajtswv tsa peb txhua tus sawv rov los muaj sia nyob ib yam li Yexus. Asmees.