“Walk
in the light – Taug kev hauv qhov pom kev”
1 Yauhas 1:1-2:2
(4/30/2006)
Greetings: Thov Vajtswv foom koob hmoov rau nej thiab
thov Vajtswv txojkev haumxeeb los kav nej lub siab rau ntawm Tswv Yexus lub
npe. Asmees.
Text: 1 Yauhas 1:6-7
Thov Vajtswv:
1. Introduction:
a. Koj nyiam qhov tsaus
ntuj tshaj, losyog koj nyiam qhov pom kev tshaj? Ntau zaug Vajtswv Txojlus muab qhov tsaus ntuj piv rau lub neej nyob hauv
qab Dabntxwgnyoog lub hwjchim, lub neej nyob hauv qab txojkev txhaum, thiab lub
neej tsis zoo. Thiab Vajtswv Txojlus
muab qhov pom kev piv rau lub neej
uas haum Vajtswv siab thiab lub neej ua raws li Vajtswv Txojlus.
b. Nyob hauv Vajluskub, feem ntau ntawm lo lus haistias “tsaus ntuj” yog hais txog yam tsis zoo,
yog hais txog kev txhaum thiab hais txog yam uas yog dabntxwgnyoog tug. Lo lus haistias “pom kev” yog hais txog yam zoo, hais txog yam uas yog Vajtswv tug,
hais txog Vajtswv thiab Tswv Yexus thiab yog hais txog cov ntseeg Yexus tias
lawv yog qhov pom kev kiag ntag.
c. Hnub no Vajtswv Txojlus hais rau peb
thiab hais rau cov ntseeg yav thaud haistias, “Vajtswv yog qhov pom kev. Yog
peb haistias peb nrog Nws (Vajtswv)
sib raug zoo, tiamsis peb taug kev hauv qhov tsaus ntuj, peb tau dag thiab peb
tsis ua neej raws li qhov tseeb. Tiamsis
yog peb taug kev hauv qhov pom kev, ib yam li Nws nyob hauv qhov pom kev, peb
sawvdaws thiaj muaj kev sib raug zoo, thiab Yexus, uas yog Nws tus tub, cov
ntshav yuav ntxuav tagnrho peb tej kev txhaum huvsi.” Cov lus no tseem ceeb kawg nkaus rau peb
txojkev ntseeg cov kwvtij. Nws hais peb
yam tseem ceeb heev rau peb li no, ib
– Nws haistias Vajtswv yog qhov pom kev; ob-
haistias cov ntseeg Yexus taug kev hauv qhov pom kev; peb – haistias cov taug kev hauv qhov pom kev lawv sib raug
zoo.
2. John’s
correction to the Christians:
a. Yav thaud muaj ib cov ntseeg Yexus lawv yog cov cuav. Lawv ntseeg haistias Yexus yog tibneeg zoo li
peb xwb, tiamsis thaum Tswv Yexus ua kevcai baptize thaum ntawd Vajtswv mam
xaiv Yexus los ua tus Khetos losyog ua tus Cawmseej. Thaum Yexus tuag sau tus ntoo khaublig thaum
ntawd tus Khetos tawm ntawm Yexus mus lawm, tsuas yog tus tibneeg Yexus tuag
xwb. Jesus was simply an idea, a knowledge or a spirit, he has no human
body.
b. Tsis yog li no xwb, cov ntseeg no lawv ntseeg haistias sab
ntsujplig yog qhov tseem ceeb, nqaijtawv tsis tseem ceeb. Yog li, tus ntseeg yuav ua mus ua kev txhaum
li cas los tau tsuav nws sab ntsujplig ntseeg thiab nrog Yexus sib raug zoo
lawm xwb. Thaum kawg nws yeej yuav tau
mus ntuj ceebtsheej.
c. Yauhas haistias cov neeg no lawv yeej tsis muaj kev sib raug
zoo nrog Vajtswv thiab nrog cov ntseeg Yexus, vim haistias lawv ntseeg yuam kev
lawm. Yauhas haistias Yexus yeej yog
Vajtswv tus tub tiag tiag. Yexus muaj
nqaij muaj tawv ib yam li peb. Yauhas
1:1-2, Yauhas haistias lawv tau tuav tau kov thiab tau nrog Yexus hais
lus. Yexus yog tus Dawbhuv uas tau los
tuag txhiv ntiajteb lub txim lawm tiag.
Yexus yog ntiajteb tus Cawmseej.
Yog peb haistias peb ntseeg Yexus, tiamsis peb tseem ua lub neej nyob
hauv qhov tsaus ntuj, uas yog tsis ua neej raws li Vajtswv Txojlus hais thiab
tsis ntseeg haistias Yexus yog Vajtswv tus tub, peb tau dag Vajtswv. Tus uas ntseeg haistias Yexus yog Vajtswv tus
tub nws taug kev hauv qhov pom kev. Vajtswv
Txojlus tsis yog hais kom ua neej hauv qhov pom kev xwb, tiamsis Vajtswv
Txojlus Mathais qhia rau peb haistias, “Cov
ntseeg Yexus yog lub teeb ci pom kev rau lub ntiajteb no ntag.” Koj thiab Kuv tseem ceeb heev rau lub
ntiajteb no li cov kwvtij. Tib lub
sijhawm uas peb taug kev ntawm qhov pom kev, peb ua rau lub ntiajteb no pom kev
thiab. Peb ua rau cov nyob hauv qhov
tsaus ntuj pom kev, peb ua rau lawv pom Vajtswv lub hwjchim dhau los ntawm peb
lub neej, peb ua rau lawv pom Vajtswv txojkev hlub dhau los ntawm tej dejnum
peb ua, thiab thaum peb qhia Vajtswv Txojlus rau lawv, peb ua rau lawv pom
kev. Koj Koj puas taug kev hauv qhov pom kev thiab koj puas ua koj lub teeb
ci ua rau neeg pom kev? Koj tsis
txhob coj Vajtsw cov lus no coj mus xav xwb, qhov no yuam kev lawm; tiamsis Koj
cia li coj cov lus no coj mus siv rau hauv koj lub neej es niaj hnub ci rau lub
ntiajteb no! Vajtswv Txojlus haistias, “Cov ntseeg Yexus mloog Vajtswv lus. Dhau qhov no mus lawm ces yog kev tsaus ntuj
lawm xwb!”
3. Our shortcoming & continue to walk
in the light:
a. Cov kwvtij txhua tus, Vajtswv Txojlus hnub no yog ib cov lus
ceebtoom losyog lus ceevfaj rau peb - hais kom peb tsis txhob ntseeg Yexus yuam
kev zoo li ib cov ntseeg thaud thiab ntuas kom peb ua neej taug kev hauv qhov
pom kev losyog cia Vajtswv Txojlus qhia peb ua neej, vim peb yog Vajtswv cov
menyuam. Analogy: Citizens mus
obey the government!
b. Muaj ntau tus ntseeg Yexus nimno lawv ntseeg yuam kev. Lawv tsis paub Yexus zoo, lawv tsis paub
haistias lawv yog leejtwg rau ntawm Vajtswv, thiab lawv tsis ua neej nyob hauv
qhov pom kev. Lawv tseem mus ua kev
txhaum thiab ua kev phem, lawv tseem nyob hauv qhov tsaus ntuj! Tej txhia tseem rov mus teev tej dabqhua uas
tsis muaj feem ntawm Vajtswv. Peb cov ntseeg
uas yog Hmoob muaj tej txhia lawv xav kom Vajtswv ua raws li lawv hais, tiamsis
lawv tsis xav ua raws li Vajtswv hais.
Lawv xav ua Vajtswv tus thawj, lawv xav kom Vajtswv yog lawv tus tub
qhe. Kuv cia siab haistias peb tsis yog cov ntseeg zoo li ntawd. Peb ntseeg haistias Yexus yog peb tus
Cawmseej tiag tiag, thiab kuv yuav cia Vajtswv Txojlus tswj kuv lub neej thiab
kuv lub siab mus li. Yog koj ntseeg li
no, koj thiaj yog tus taug kev hauv qhov pom kev raws li Vajtswv Txojlus
haistias, “Lawv ua neej phim lawv
txojkev ntseeg…”
c. Koj
puas ua neej phim koj txojkev ntseeg?
Nco ntsoov koj yeej dag tsis tau Vajtswv. Kuv yeej dag Vajtswv tsis tau. Koj yeej hais tsis tau rau Vajtswv haistias
koj ntseeg, tiamsis koj lub neej ua txawv dua qhov uas Vajtswv Txojlus
hais. Yauhas hais rau cov ntseeg thaud
haistias, “Yog nej tsis taug kev hauv
qhov pom kev ces nej tau dag thiab nej tsis ua neej raws li qhov tseeb.” Koj thiab kuv tsis txhob dag Vajtswv nyob
tsam peb tsis dim peb lub txim!
d. Koj thiab kuv yuav tau ntsuam xyuas peb
txojkev ntseeg thiab peb lub neej txhua hnub saib puas raws li Vajtswv Txojlus
hais. Yav dhau los yog qhovtwg koj yuam kev lawm, koj lees txim rau Vajtswv
es cia Vajtswv tus Ntsujplig hloov koj thiab coj koj txoj hauv kev kom koj ua
tau koj lub neej phim qhov koj yog ib tus ntseeg uas zoo tiag tiag. Vajtswv Txojlus haistias tus uas lees txim
rau Vajtswv, Vajtswv yuav zam txim rau tus ntawd. Tiamsis tus uas haistias nws tsis muaj kev
txhaum, nws tau dag nws tus kheej, qhov tseeb yeej tsis nyob hauv nws. Yog yam twg koj ua haum Vajtswv siab lawm,
koj tabmeeg ua yam ntawd ntxiv mus nrog Vajtswv lub hwjchim pab. Vajtswv Txojlus ntuas peb haistias, “Cov ntseeg tsis txhob nkees ua dejnum zoo….” Yog li, peb tabmeeg ua dejnum zoo rau qhov
nws yog peb lub luag dejnum. Nws tsis
yog peb dejnum zoo kom peb dim, tiamsis peb twb dim lawm peb thiaj ua dejnum
zoo vim dejnum zoo haistias yog peb lub luag dejnum! Analogy: The love between husband and wife and parents
to children. We do it because of who we
are!
4. Closing:
a. Cov kwvtij, Vajtswv xav kom peb dim peb lub txim. Vajtswv tsis xav kom peb raug txim hnub lub
ntiajteb no kawg. Yog li, Vajtswv thiaj
txib Yexus los ua peb tus Cawmseej. Nimno peb twb yog Vajtswv cov menyuam lawm. Dhau los ntawm peb txojkev ntseeg thiab kev
yug dua tshiab ntawm dej thiab ntawm Vajtswv lub npe, Vajtswv muab peb ua qhov
pom kev rau lub ntiajteb no. Peb yuav
tau taug kev hauv qhov pom kev, thiab peb ua lub teeb ci pom kev lajlug txhua
hnub hauv koj lub neej uas yog cia Vajtswv Txojlus qhia peb ua neej thiab qhia
peb ntseeg Tswv Yexus haistias peb yuav ua li cas thiab ntseeg li thiaj zoo
thiab thiaj yog. Peb tsis txhob ua
neej zoo li ib cov ntseeg thaud ub es yuav rov mus ua kev txhaum losyog muab Yexus
saib tsis tseem ceeb, losyog lub ncauj
hais ib yam tiamsis tej dejnum tshwm yog lwm yam. Peb tsis txhob ua li ntawd. Peb ua lub neej tseeb raws li Vajtswv Txojlus
hais. Vim koj yog Vajtswv ib tug menyuam, txhua hnub koj cia li zoo siab hlo,
kaj siab lug thiab kub siab lug ua txhua
yam kom zoo tshajplaws vim haistias Yexus cov ntshav tau ntxuav koj los ua tus
neeg dawbhuv thiab zoo tshajplaws rau Vajtswv lawm. Tsis txhob pub qhov tsaus ntuj muaj feem nyob
hauv koj lub neej ntxiv lawm, tiamsis rau siab ntso taug kev hauv qhov pom kev
thiab ua koj lub teeb cia txhua hnub nrog Vajtswv lub hwjchim pab!
b. Thov Vajtswv foom koob hmoov rau nej thiab thov Vajtswv txhawb
nej lub siab lub ntsws rau ntawm Tswv Yexus lub npe. Asmees.