Muab Vajtswv tug rau Vajtswv

Mathais 22:15-21 – Kxh. Ntxoov Yias Vaj

 

Greetings:   Thov Vajtswv foom koob hmoov rau nej, thiab thov Vajtswv txojkev hlub nrog nraim nej txhua tus nyob rau ntawm Tswv Yexus lub npe.  Asmees.

Text:  Mathais 22:21

Thov Vajtswv:

 

1.         Introduction:
            a.         Peb ua tibneeg nyob muaj ib txhia neeg mas lawv lub homphiaj ua neej yog yuav ua kom qhov zoo puastsuaj.

 

b.         Peb haivneeg Hmoob muaj ib cov zoo li ntawd.  Kuv xav haistias txhua haiv tibneeg muaj ib cov zoo li ntawd thiab.  Cov neeg no lawv yeej tsis muaj kev haumxeeb nrog leejtwg li.

 

c.         Lawv lub siab thiab lawv tes dejnum yog ua kom txhua yam zoo puastsuaj; lawv xav haistias qhov thiaj yog xwb.  Tiamsis qhov tseeb tiag lawv yuam kev loj thiab lawv yog cov yuav raug puastsuaj ntag.

 

2.         Cov Falixais kev tawmtsam Yexus:
            a.         Vajtswv Txojlus qhia rau peb haistias cov Falixais thiab cov Xibhwb qhia Vajtswv cov kevcai lub sijhawm Tswv Yexus nyob hauv ntiajteb no lawv tabmeeg nrhiav kev los tawmtsam Yexus ua kuas tej dejnum Yexus los ua tsis txhob tiav.  Lawv xav muab Yexus tuav povtseg.

 

b.         Hnub no peb pom haistias cov neeg no lawv tuaj sim Yexus kom Yexus ua txhaum losygo hais lus txhaum es lawv thiaj zoo ntes Yexus coj mus kaw losyog coj mus tua povtseg.

 

c.         Lawv tuaj sim Yexus haistias puas tsimnyog cov Yudais them se rau huabtais Xixas.  Yexus twb paub haistias qhov lawv nug ntawd tsis yog nug zoo, tiamsis lawv muaj siab phem.

 

d.         Yexus thiaj cem lawv haistias, “Cov niag neeg ntxeev siab!  Ua cas nej tuaj sim Kuv.”  Nej cia li muab lub npib nyiaj nej them se los rau kuv saib.  Thaum lawv coj lub nyiaj los rau Yexus saib.  Yexus hais rau lawv tias, “Tus duab hauv lub nyiaj yog leejtwg tug?”  Lawv haistias yog Xixas tus duab.  Yexus hais rau lawv tias, “Yam uas yog Xixas li, muab rau Xixas; yam uas yog Vajtswv li, muab rau Vajtswv.”   Cov neeg tuaj sim Yexus ntawd lawv xav tsis thoob rau Yexus tej lus, lawv txawm khiav mus lawm.

 

3.         Ntaus nqi rau peb tamsim no:
            a.         Nyob huv koj lub neej, koj xav haistias yam twg yog Vajtswv tug?  Yam twg yog koj tug?

 

b.         Raws li Vajtswv Txojlus qhia rau peb, txhua yam uas peb muaj yog Vajtswv tug huvsi.  Peb txojsia los yog Vajtswv tug ib yam nkaus.  Peb lub neej, peb tej tswvyim, peb tej haujlwm los yog Vajtswv foom pub peb thiaj tau thiab muaj tej ntawd.

 

c.         Tiamsis Vajtswv tsi xav tau ib puas tsav yam peb muaj ntawd.  Qhov Vajtswv xav tau tshajplaws ntawm peb yog peb lub siab.  Vajtswv hais kom peb yuav tau nrog neeg sis raug zoo raws li Vajtswv Txujlus. Vajtswv hais kom peb yuav tau siv peb tej khoom thiab lub tswvyim peb muaj raws li Vajtswv Txujlus hais.  Vajtswv xav kom peb ntseeg Vajtswv tus tub, Yexus, peb tus Cawmseej peb thiaj yuav dim peb lub txim.  Tej no yog Vajtswv tug, tej no yog tej uas Vajtswv xav tau ntawm peb.  Peb yuav tau muab Vajtswv tug rau Vajtswv.  Vajtswv tsis xav tau peb tej khoom thiab peb tej nyiaj, tiamsis Vajtswv xav tau peb lub siab ntseeg Vajtswv thiab lub siab mloog Vajtswv lus.  Thaum Vajtswv tau peb lub siab lawm, peb yeej txawj muab Vajtswv tug rau Vajtswv.  Muaj ib cov ntseeg lawv tsis muab Vajtswv tug rau Vajtswv, vim lawv tsis pub Vajtswv kav lawv lub siab tiag tiag.  Lub ncauj lees haistias ntseeg, tiamsis lub siab tseem nyob deb heev ntawm Vajtswv.  Peb yog Vajtswv tsim, peb yog Vajtswv cov menyuam, peb yog Vajtswv tug.  Peb yuav tau mloog Vajtswv lus, muab Vajtswv tug rau Vajtswv.

 

4.         Lus xaus:
            a.         Dhau los ntawm peb txojkev ntseeg Yexus ua peb tus Cawmseej, peb yog Vajtswv cov menyuam.  Vajtswv hais kom peb mloog Vajtswv lus.  Tsimnyog peb mloog Vajtswv lus, rau qhov Vajtswv hlub peb heev.  Nws twb txhiv peb lub txim thiab tso peb dim txhua yam uas phem dhau los ntawm Nws tus tub, Yexus Khetos lawm.

 

b.         Yog vim li cas peb tseem tawvncauj rau ntawm Vajtswv?  Peb yuav tau mloog txhua yam Vajtswv hais.  Peb yuav tau ceev Vajtswv tej kevcai ntawm peb kev ua neej.  Vajtswv cov kevcai yog cov qhia peb ua neej.  Peb yuav tau muab Vajtswv Txoj Moo Zoo qhia rau tibneeg. Txhua yam peb ua peb yuav tau cia Vajtswv Txojlus txiav txim rau peb, peb mam ua Vajtswv thiaj tau ntsejmuag thiab raws li Vajtswv Txojlus.  Tsis tsimnyog peb yuav ua txhua yam raws li peb lub siab.  Qhov no yuam kev lawm.

 

c.         Hnub no kuv thov ntuas nej li no, nej nco ntsoov haistias nej yog Vajtswv tug, txhua yam nej muaj yog Vajtswv tug, Vajtswv yog tus Tswv ntawm txhua yam.  Nej cia li mus ua lub neej kaj siab lug tias Vajtswv yog nej tus Tswv.  Nws yog tus yuav tsomkwm saib xyuas nej thiab yuav foom koob rau nej lub cev thiab sab ntsujplig, thiab zoo siab hlo cia nws siv nej thiab qhib nej lub siab lub ntsws kom nej txawj muab Vajtswv tug rov rau Vajtswv raws li qhov Vajtswv xav tau ntawm nej.

 

d.         Thov Vajtswv foom koob hmoov rau nej thiab thov Vajtswv pab kom peb yuav ua tau lub neej kom Vajtswv tau koobmeej thiab tsimnyog yog Nwg cov menyuam uas zoo kawg nkaus rau ntawm Tswv Yexus lub npe.  Asmees.