Koj puas mus ua haujlwm hauv Vajtswv lub vaj

Mathais 21:28-32

Greetings: Thov Vajtswv foom koob hmoov rau nej, thiab thov Vajtswv txojkev haumxeeb nrog nej nyob rau ntawm Tswv Yexus lub npe. Asmees.

Nyeem Vajluskub: Mathais 21:31

Thov Vajtswv:

1. Introduction:
a. Peb cov uas yog niam yog txiv, peb niaj hnub txib peb tej menyuam kom lawv pab peb ua haujlwm hauv lub vaj lub tsev. Tej tug thaum peb txib lawv ua raws li peb hais; tej tug thaum peb txib lawv tsis ua raws li peb hais. Thaum tus menyuam peb txib, nws mloog hais, peb ua niam ua txiv, peb zoo siab heev. Tus tsis mloog peb hais, nws ua rau peb chim thiab tu siab!

b. Niaj hnub no peb muaj tej txhia niam txiv hais tsis tau lawv tej menyuam, qho no ua rau lawv nyuaj siab kawg nkaus. Niam txiv thiab menyuam txojkev sib raug zoo yog ib yam uas Vajtswv tsim rau txhua tsev neeg. Txhua tsevneeg yuav tau muaj kev sib raug zoo thiab kev sib hlub thiab sawvdaws yuav tau sib pab. Qhov no yog tes dejnum Vajtswv tsim tseg rau txhua tsev tibneeg!

c. Lub sijhawm twg yog peb tsis ua neej raws li qhov uas Vajtswv tsim tseg rau peb no, ces peb yeej yuav ntxhov siab, yeej yuav muaj teebmeem thiab yuav nyob tsis taus uake.

2. Leejtxiv txib nws ob tug tub mus ua haujlwm hauv lub vaj:
a. Txoj Moo Zoo hnub no Tswv Yexus qhia ib zaj pivlus rau cov Xibhwb qhia Vajtswv kevcai thiab cov Txwjlaug mloog haistias, “Muaj ib leejtxiv muaj ob tug tub. Muaj ib hnub leejtxiv mus hais rau nkawv tias kom nkawv mus ua haujlwm hauv lub vaj. Leejtxiv mus hais rau tus tub hlob, tiamsis nws tsis kam mus, tom qab ntawd nws hloov siab nws mus ua haujlwm hauv lub vaj. Leejtxiv mus hais rau tus tub yau, nws teb haistias, Aw, kuv mam mus, tiamsis nws tsis mus. Tswv Yexus nug lawv haistias, “Ob tug tub no tus twg yog tus ua raws li Leejtxiv hais?” Lawv teb haistias, “Yog tus tub hlob.”

b. Cov kwvtij txhua tus, peb nco ntsoov haistias Vajtswv cov lus yog lus ciajsia thiab muaj nqi rau txhua tus tibneeg nyob txhua tiam hauv lub ntiajteb no. Hnub uas Tswv Yexus hais cov lus ntawd yog Nws hais cov Xibhwb qhia Vajtswv cov kevcai thiab cov Txwjlaug ntawd ntag. Lawv khav haistias lawv yog Vajtswv cov neeg, tiamsis lawv tsis ntseeg Tswv Yexus thiab lawv tsis hlub tej pejxeem, tiamsis lawv tsis ua neej raws li Vajtswv Txojlus hais. Tswv Yexus hais zaj lus no Tswv Yexus xav kom lawv xav rau lawv tus kheej es lawv lees lawv tej kev txhaum thiab los ntseeg Tswv Yexus ua lawv tus Cawmseej, vim haistias lub sijhawm no lawv zoo li tus tub yau; lawv haistias, Aws, kuv mam mus ua haujlwm tiamsis lawv tsis mus ua.

c. Tus tub hlob, piv txog cov neeg txhaum, cov niam ntiag thiab coob tug tsis ntseeg lub sijhawm Tswv Yexus nyob ntawd. Thaum ntej lawv tsis mloog Vajtswv lus, lawv mus ua lub neej pheej kawg nkaus. Tiamsis thaum lawv hnov txog tias Tswv Yexus yog tus Cawmseej lawv los ntseeg Tswv Yexus. Lawv tso lawv tej kev txhaum thiab lawv mloog Vajtswv lus. Cov neeg no yog cov ua haum Leejtxiv siab. Lawv zoo li tus tub hlob uas thaum ntej mas lawv haistias yuav tsis mus ua haujlwm hauv lub vaj, tiamsis lawv hloov siab mus, rau qhov lawv txiv tau txib lawv lawm.

3. Txoj Moo Zoo hnub no ntau nqi li cas rau peb:
a. Vajtswv Txojlus hnub no yog hais rau koj thiab kuv ib yam nkaus li hais rau cov neeg thaud. Yav thaum ub peb tsis ua lub neej raws li Vajtswv hais, peb zoo li tus tub yau uas tsis mus ua haujlwm hauv lub vaj. Peb tsis ntseeg Yexus, peb mus ua kev txhaum ntau yam uas tsis haum Vajtswv siab. Vajtswv tu siab rau peb heev! Tiamsis thaum peb hnov Txoj Moo Zoo hais txog Tswv Yexus txojkev hlub thiab kev cawm dim, peb tso peb txojkev tsis ntseeg tseg los ntseeg Tswv Yexus ua peb tus Cawmseej. Thaum no, Vajtswv zam peb tej kev txhaum, thiab Vajtswv coj peb los ua Vajtswv cov menyuam dawbhuv. Vajtswv tau foom txhua yam koob hmoov sau ntuj losyog ntawm sab ntsujplig rau peb.

b. Nimno peb yog cov ntseeg Yexus lawm, zaum no Txoj Moo Zoo hnub no ntau nqi rau peb zoo li cov ntseeg Yexus thiab. Vajtswv Txojlus kom cov ntseeg Yexus txhua tus mus haujlwm hauv Nws lub vaj. Vajtswv Txojlus hais kom peb cov ntseeg txhua tus ua dua lub neej tshiab raws li Vajtswv Txojlus hais. Peb yuav tau hlub kwvtij zejzog li peb hlub peb tus kheej. Peb yuav tau tso lub neej qub tseg. Peb tsis txhob mus ua kev txhaum. Peb yuav tau cia Vajtswv hloov peb lub siab. Peb yuav tau cia Vajtswv Txojlus tswj peb lub siab, kav peb thiab qhia peb ua neej. Qhov no yog qhov uas peb yuav tau mus ua haujlwm hauv Vajtswv lub vaj.

c. Koj puas cia Vajtswv ua dejnum zoo li no nyob hauv koj lub neej? Koj puas mus ua haujlwm hauv Vajtswv lub vaj? Leejtxiv ob tug tub ntawd, koj xav haisitas koj yog tus twg? Nyob rau ntawm Tswv Yexus cov lus peb hnov hnub no yog Tswv Yexus hais kom cov Xibhwb Cev Vajtswv lus thiab cov Txwjlaug coj mus xav es kom lawv tso lawv lub neej uas tsis haum Vajtswv siab tseg los mus ntseeg Tswv Yexus thiab ua lub neej raws li Vajtswv Txojlus hais tiag tiag – tsis yog yuav lam lees ntawm lub ncauj xwb, tiamsis tes dejnum tsis muaj.

4. Lus xaus:
a. Cov kwvtij txhua tus, peb nco ntsoov ua Vajtswv tsaug, vim Vajtswv txojkev hlub peb, Vajtswv thiaj tau txib Tswv Yexus los tuag theej peb lub txim thiab coj peb rov mus nrog Vajtswv sib raug zoo lawm. Vajtswv Txojlus hais kom peb txhua tus uas yog Vajtswv cov menyuam yuav tau mloog Vajtswv lus. Lo lus haistias, “Mloog Vajtswv lus” no yog txhais haistias peb mus ua kiag raws li Vajtswv hais.

b. Yuav ua li cas peb thiaj ua tau raws li Vajtswv hais? Peb yuav tau cia Vajtswv Txojlus tswj peb lub siab thiab lub neej. Vajtswv yog tus yuav pab peb ua tau raws li Vajtswv hais. Thaum Vajtswv Txojlus nyob hauv peb lub siab lawm, Vaj Ntsujplig tus Dawbhuv yuav ua rau peb zoo siab hlo mus ua haujlwm hauv Vajtswv lub vaj. Qhov no yog qhov haum Vajtswv siab thiab yuav ua rau Vajtswv tau koobmeej.

c. Thov Vajtswv tus Ntsujplig tus Dawbhuv yuav pab nej txhua tus kom nej yuav zoo siab hlo mus ua haujlwm hauv Vajtswv lub vaj rau ntawm Tswv Yexus lub npe. Asmees.