Vajtswv hu peb los tu lwm tus – We are called to servanthood

Mathais 20:17-28

Greetings: Thov Vajtswv foom koob hmoov rau nej thiab thov Vajtswv txojkev hlub nrog nraim nej txhua tus nyob ntawm Tswv Yexus lub npe. Asmees.

Text: Mathais 20:25-28

Thov Vajtswv:

1. Introduction:
a. Peb haivneeg Hmoob yog ib haivneeg uas nyiam kev ua nom ua tswv heev. Peb nyiam ntuas peb tej tub tej ntxhais kom lawv rau rau siab kawm ntawv kom lwm hnub lawv thiaj tau los ua nom ua tswv.

b. Hmoob zaj qhuabke ntuas tus tuag kom nws mus muab kom tau daim ntawv rov los thawjthiab ua nom ua tswv.

c. Kev ua nom ua tswv yog ib yam uas peb haiv Hmoob nyiam tham heev. Kuv kuj tsis paub haistias Hmoob lub tswvyim ua nom ua tswv yog dabtsi – xyov yog ua nom ua tswv thiaj tau tau nyob noj nyob haus xwb es tsis tau khwv, losyog ua nom ua tswv thiaj tau tswjhwm lwm tus, losyog ua nom ua tswv thiaj npluanuj, losyog vim peb tsis muaj teb tsis muaj chaws es peb xav sawv los ua nom ua tswv tawmtsam peb cov yeebncuab kom peb muaj tebchaws nyob, etc.

2. A mother’s request:
a. Lub sijhawm uas Tswv Yexus tseem nrog cov thwjtim nyob, thaum ntej, lawv kuj tsis totaub txog Tswv Yexus tes dejnum. Thiab cov pejxeem sawvdaws tsis totaub tias Yexus yog leejtwg tiag tiag.

b. Cov thwjtim thiab cov uas paub Yexus lawv xav haistias Yexus yuav sawv los ua cov Yudais tus Huabtais losyog tus thawjcoj – zoo li ib tug political leader.

c. Ib hnub txawm muaj ib leejniam coj nws ob tug tub tuaj cuag Yexus thiab nws thov kom Yexus muab ob tug tub ntawd ib tug zaum ntawm Yexus sabxis ib tug ntawm Yexus sablaug. Peb paub haistias ob tug tub ntawd ib tug yog Yauhas ib tug yog Yakaunpaus. Nkawv yog Yexus ob tug thwjtim uas ua dejnum nyob ze Yexus heev. Nkawv niam xav kom nkawv tau ua ob tug uas loj tshajplaws tagnrho ntawm cov thwjtim uas yuav nrog Yexus kav tebchaws. Tiamsis lawv totaub yuamkev loj kawg nkaus txog Yexus lub tebchaws.

d. Yexus teb nkawv niam haistias tes dejnum ntawd tsis yog Yexus tes dejnum, nws yog Vajtswv tes dejnum. Vajtswv npaj rau tus twg, tus ntawd thiaj yuav tau xwb. Thaum kaum tus thwjtim hnov txog ob tug kwvtij tuaj ua li no, lawv chim rau nkawv heev.

3. Greatness in the eyes of the Gentiles:

a. Tswv Yexus thiaj pib qhia cov thwjtim haistias tus loj ntawm nej pab yuav zoo tsis thooj li cov tsis ntseeg tus loj.

b. Cov tsis ntseeg cov thwjcoj lawv tswjhwm pejxeem. Thiab cov nomtswv lawv siv hwjchim los kav pejxeem. Tiamsis nej tsis txhob ua li ntawd.

c. Tswv Yexus qhia ntxiv rau lawv haistias yog leejtwg xav ua tus loj, tus ntawd yuav tau ua tus tubtxib (servant). Yog leejtwg xav ua tus nyob tom hauv ntej, nws yuav tau ua sawvdaws tus qhev (slave). Tsis yog li n o xwb, Yexus haistias nej yuav tau ua ib yam li Neeg Leejtub, Nws tsis los kom leejtwg tu Nws, tiamsis Nws los tu sawvdaws kom Nws cawm tau coob leej.

4. Greatness in God’s kingdom:
a. Cov kwvtij txhua tus, Tswv Yexus muab txojkev ua tus loj losyog kev ua nom ua tswv ntawm cov tsis ntseeg thiab ntawm cov ntseeg qhov siab tig los ua qhov qis, thiab muab qhov qis tog ua qhov siab. Tus loj ntawm cov tsis ntseeg nws tswj pejxeem, nws kav pejxeem thiab nws yuam pejxeem; tiamsis tus loj ntawm cov ntseeg nws tu sawvdaws losyog nws koom sawvdaws.

b. Vajtswv Txojlus qhia rau peb haistias Tswv Yexus yog tus uas muaj hwjchim loj tshajplaws, tiamsis Nws txo hwjchim los tu tibneeg - los ua lub neej pab tibneeg, raug txomnyem pab tibneeg thiab thaum kawg tuag saum tus ntoo khaublig txhiv sawvdaws lub txim. Vajtswv Txojlus haistias qhov uas Tswv Yexus txo hwjchim no, Vajtswv tsa Yexus ua tus lpj tshajplaws txhua tus. Txhua haiv tibneeg yuav los pe Nws thiab hu haistias Nws haistias tus Tswv.

c. Tswv Yexus tsis tau hais kom cov ntseeg mus tuag zoo li Yexus tuag, tiamsis Yexus hais kom cov ntseeg yuav tau muaj lub siab sib pab thiab sib hlub, ib tug tsis txhob tswjhwm ib tug zoo li cov tsis ntseeg tej nom tej tswv. Tus thawj thiab tus loj rau ntawm Vajtswv yog tus uas zoo siab hlo koom lwm tus thiab tu lwm tus.

d. Tswv Yexus siv lo lus haistias “servant thiab slave” los hais ua ob tug loj rau ntawm cov ntseeg. Peb paub haistias tus servant thiab slave nkawv ua haujlwm nkawv yeej tsis nrhiav meejmom thiab tsis nrhiav kev qhuas los ntawm nkawv tus tswv losyog ntawm tibneeg, tiamsis nkawv zoo siab ua nkawv tes dejnum xwb.

5. Closing:
a. Tswv Yexus tau txhiv peb lub txim lawm, thiab Vajtswv tau coj peb los ua Vajtswv cov menyuam losyog cov tibneeg uas zoo kawg nkaus. Vajtswv hais kom peb ua lub neej txawv dua li cov tsis ntseeg losyog ntiajteb hais txog kev yuav ua tus loj losyog tus thawj. Vajtswv ntuas kom peb tsis txhob muab ntiajteb tej kev tswjhwm coj los siv rau hauv Vajtswv tsevneeg. Vajtswv hais kom peb cia li zoo siab hlo thiab npaj siab txhua lub sijhawm yuav mus tu, mus koom losyog mus pab Vajtswv cov tibneeg. Qhov no yog qhov tseem ceeb thiab qhov muaj nqis rau ntawm Vajtswv.

b. Kev yuav ua tau raws li Yexus hais no tsis yoojyim, vim haistias ntawm peb tus kheej peb nyiam hwjchim peb nyiam kav neeg heev. Yuav ua li cas Vajtswv Txojlus thiaj yuav tiav rau hauv peb lub neej? Peb yuav tau kawm Vajtswv Txojlus, peb yuav tau mloog Vajtswv Txojlus, peb yuav tau cia Vajtswv Txojlus tswj peb lub siab thiab ntau thawj rau txhua yam hauv peb lub neej. Cov kwvtij, Vajtswv Txojlus yog Vajtswv lub hwjchim uas hloov tau peb lub siab lub ntsws – sab nqaijtawv thiab sab ntsujplig huvsi. Vajtswv Txojlus yuav txo peb lub hwjchim thiab Vajtswv Txojlus yuav muab lub siab tu lwm tus rau peb. Thaum Vajtswv Txojlus kav peb lub siab lawm peb yuav muaj lub siab dawbpaub ua tau peb lub neej zoo li tus tubtxib thiab tus tubqhev ua nkawv lub neej raws li Tswv Yexus hais.

c. Hnub no thov Vajtswv foom koob hmoov rau nej thiab pab kom Nws Txojlus yuav tiav rau hauv nej lub neej rau ntawm Tswv Yexus lub npe. Asmees.