Tus neeg ncajncees rau ntawm Vajtswv

Loos 4:1-5 ( Kxh. Ntxoov Yias Vaj)

Greetings: Thov Vajtswv foom koob hmoov rau nej, thiab thov Vajtswv txojkev hlub nrog nraim nej txhua tus nyob rau ntawm Tswv Yexus lub npe. Asmees.

Text: Loos 4:1-5

Prayer:

1. Introduction:
a. Vajtswv Txojlus uas Kuv yuav qhia hnub no hu ua, “Tus neeg ncajncees rau ntawm Vajtswv.”

b. Nej xav haistias tus neeg ncajncees rau ntawm Vajtswv yog tus neeg zoo li cas thiab nws ua lub neej zoo li cas?

c. Vajtswv Txojlus qhia rau peb haistias peb txhua tus yog tibneeg txhaum. Neeg ntiajteb tsis muaj tus ncajncees hlo li (compare it with the Ten Commandments).

2. Aplaham yog tus ncajncees:
a. Vajtswv Txojlus Loo hnub no qhia rau peb haistias Vajtswv suav haistias Aplaham yog tus tibneeg ncajncees. Yog vim li cas Vajtswv thiaj suav haistias Aplaham yog tus tibneeg ncajncees. Yog vim tej dejnum uas Aplaham ua losyog vim li cas?
b. Vajtswv Txojlus qhia rau peb haistias qhov uas Vajtswv suav haistias Aplaham yog tibneeg ncajncees vim yog Aplaham ntseeg Vajtswv. Aplaham cia siab rau Vajtswv ua Nws tus Tswv. Aplaham mloog Vajtswv lus. Nws tsis yog vim Aplaham ua lub neej zoo losyog tsis yog vim Aplaham yog tibneeg zoo. Yog haistias vim tej no ces Aplaham yuav muaj lus khav, tiamsis tsis yog vim tej dejnum uas Aplaham ua Aplaham thiaj khav tsis tau. Tiamsis vim yog Aplaham ntseeg, Vajtswv suav haistias (credited) Aplaham yog tibneeg ncajncees rau ntawm Vajtswv.

c. Tus neeg uas ncajncees rau ntawm Vajtswv, nws nrog Vajtswv sib raug zoo, thiab Vajtswv zam nws tej kev txhaum. Nws thiab Vajtswv tsis yog yeebncuab. Nws yog tibneeg dawbhuv rau ntawm Vajtswv.

3. Cov ntseeg Yexus yog tibneeg ncajncees rau ntawm Vajtswv:
a. Cov kwvtij txhua tus, thaum koj thiab kuv peb los ntseeg Yexus ua peb tus Cawmseej losyog thaum peb ua kevcai ntxuav rau ntawm Vajtswv lub npe, lub sijhawm ntawd losyog hnub ntawd, Vajtswv suav tias peb yog neeg ncajncees rau ntawm Vajtswv, vim haistias thaum ntawd peb tau txais Vajtswv cov koob hmoov ntawm tus ntoo khaublig.

b. Hnub ntawd Vajtswv zam peb tej kev txhaum. Vajtswv suav haistias peb yog neeg ncajncees dhau los ntawm peb txojkev ntseeg uas Vajtswv tus Ntsujplig tus Dawbhuv muab rau peb. Peb yog Vajtswv cov menyuam uas zoo kawg nkaus.

c. Txojkev ncajncees rau ntawm Vajtswv tsis yog ib yam uas peb yuav khwv tau, tiamsis yog yam uas Vajtswv muab pub dawb dawb rau peb xwb, rau qhov peb ntseeg Vajtswv tus tub Yexus ua peb tus Cawmseej thiab tus Tswv rau peb txojsia, lub neej thiab peb tus ntsujplig. Qhov no yog qhov uas rau peb yog tibneeg ncajncees. Yog haisitas peb yuav khwv rau txojkev ncajncees, peb yeej tsis muaj leejtwg yuav ua tau tibneeg ncajncees, vim peb yog neeg txhaum.

4. Lus xaus:
a. Peb ua Vajtswv tsaug uas Vajtswv tsis suav txim rau peb lawm, thiab Nws suav tias peb yog neeg ncajncees. Nej yuav tau nco ntsoov tias tus neeg ncajncees nws cia siab heev rau Vajtswv Txojlus. Nws cia Vajtswv qhia Nws ua neej. Nws vamkhom Vajtswv rau txhua yam. Nws cia Vajtswv ua nws lub hwjchim. Nws tos ntsoov Vajtswv ua tus foom koob hmoov rau nws lub neej tamsim no thiab mus lawm yav tom ntej ib yam li Aplaham cia siab rau Vajtswv.

b. Tus neeg ncajncees nws mloog Vajtswv lus. Nws ua nws lub neej rau Vajtswv tau koob meej thiab tau ntsejmuag. Nws hwm Vajtswv lub npe thiab nws muab siab npuab Vajtswv heev. (Yauhas 15), Nws cia Tswv Yexus tus yug nws txojsia thiab lub neej. Nws lub zog yog Vajtswv lub zog. Nws nco ntsoov Vajtswv txojkev hlub thiab nws qhia Vajtswv txojkev hlub rau lwm tus kom lawv los txais Vajtswv cov koob hmoov ib yam nkaus.

c. Hnub no thov Vajtswv foom koob hmoov rau nej txhua tus, thiab pab kom nej nco ntsoov tias peb yog tibneeg ncajncees rau ntawm Vajtswv lawm, thiab thov Vajtswv pab kom nej txawj ntseeg thiab ua tau lub neej tsimnyog qhov uas nej yog Vajtswv cov neeg ncajncees kom Nws tau koobmeej mus li. Asmees.