“Kuv Khaiv Koj Moog”

Twenty-fifth Saturday after Pentecost

St. Michael Lutheran Church

11-10-07

Thov txuj koob txujmoov hab txujkev kajsab lug pub rua suavdlawg lug ntawm Vaajtswv kws yog peb Leejtxiv kws yog peb tug Tswv Yexus Khetos. Asmees

Tsiv Dlim 3:10 “So now, go. I am sending you to pharaoh to bring my people the Israelites out of Egypt. - Ca le moog. Kuv khaiv koj moog rua falaus moog coj kuv haiv tuabneeg yog cov Yixalayees tawm tim Iziv tebchaws.” (NIV – I translated )

Nuav Yog tug Tswv Txujlug.

Illustration: Movie clip from the “Ten Commandment – Moses at the burning bushes”

I. Mauxes luj hlub huv Falaus lub tsev txawm hastas Mauxes yog haiv tuabneeg Yudais ‘Jew.’ Lawv le Vaajtswv lub homphaj Mauxes txhaj le tau lug ua neej kawm kev txawj kev ntse, kev ua thawj coj, nrug rua ntau yaam kws yog tseg rua haiv tuabneeg Iziv tej tub nom tub tswv xwb.

Thaum Mauxes muaj 40 xyoo, Mauxes xaav hastas nwg yuav ua tau txhua yaam lawm. Nwg xaav paab nwg haiv tuabneeg Jewish kws raug ua cevqhev ntau taam lug kuas puab dlim ntawm txujkev tsimtxom tabsis nwg ua tsi tau lawv le nwg lub sab xaav. Yog le ntawm thaum Falaus muab Mauxes tshem tawm huv Iziv tebchaws, Mauxes txhaj le moog nyob tom tebchaws Midias kws yog taj suabpuam yug nwg yawmtxiv cov yaaj tau le 40 xyoo ntxiv. Thaum nuav Mauxes muaj 80 xyoo. Vaajtswv maam le rov hu kuas Mauxes moog tso Vaajtswv haiv tuabneeg kws raug ua cevqhev ntev heev le lawm. Zag nuav Vaajtswv yuav ua lawv le Vaajtswv lub homphaj. Vaajtswv txhaj le hastas,

Tsiv Dilm 3:10 “So now, go. I am sending you to pharaoh to bring my people the Israelites out of Egypt. - Ca le moog. Kuv khaiv koj moog rua falaus moog coj kuv haiv tuabneeg yog cov Yixalayees tawm tim Iziv tebchaws.” (NIV – I translated )

Tabsis Mauxes twb muaj 80 xyoo lawm es ua le caag Vaajtswv tseem yuav siv nwg. Nwg twb tsis hluas le thaum nwg muaj 40 xyoo lawm. Yog le ntawd Mauxes txhaj le nrhav tswvyim ntau yaam lug moog nug Vaajtswv. Vs. 11 “But Moses said to God, "Who am I, that I should go to Pharaoh and bring the Israelites out of Egypt? – Mauxes has rua Vaajtswv tas, “Kuv yog leejtwg, es kuv txhaj le yuav moog rua ntawm Falaus hab coj cov Yixalayees tawm tim Iziv?” (NIV – I translated)

Tuabneeg nplajteb los yeej najnub rhav lwm txujkev “excuse” rua Vaajtswv tuabyaam hab yog thaum twg Vaajtswv khaiv kuas peb yuav tsum moog tshaaj tawm Vaajtswv Txujmoo Zoo rua lub nplajteb nuav. Ntau zag tuagneeg yuav hastas, “Kuv yog leejtwg? Kuv tsis khoom vim kuv muaj dlejnum ntau heev. Kuv tsis muaj sijhawm. Kuv tseem xaav pws ntxiv vim naagmo kuv nyob lig heev lawm. Kuv tsi paub qha lwmtug txug Vaajtswv.” Mej sim ua tuab zoo xaav saib, Mauxes tsuas yog ib tug tuabneeg zoo le koj hab zoo le kuv xwb. Nwg tsi yog ib tug twg kws yuav muaj fwjchim, muaj lub koob lub npe nrov, los yog ib tug kws tseemceeb. Mauxes txhawj tas nwg yuav ua tsi tau Vaajtswv teg dlejnum. Koj hab kuv los yeej txhawj tas peb yuav ua tsi tau Vaajtswv teg dlejnum ibyaam nkaus hab.

Tabsis, Vaajtswv pub peb ib leeg muaj ib yaam tswvyim kws yog koobmoov ntawm Vaajtswv. Peb txhua tug nyag muaj nyag lub tswvyim kws Vaajtswv yog tug pub kws yog lug ntawm Vaajntsujplig Dlawbhuv. Tej zag koj tau koobmoov kws yog paab rua cov tuabneeg txomnyem, txawj kov computers, luag ntxwb ntxis rua lwm leej lwmtug, koom yaam kws koj muaj nrug lwmtug, txais tog qhua, qha cov mivnyuas yaus losyog paab rua cov hluas. Tej nuav yog lub tswvyim kws yog koobmoov Vaajtswv pub rua koj ua tau haujlwm zoo rua lwmtug. Mej ibtxha yuav ua dlejnum tau zoo yog mej nrug ib paab uake. Mej ibtxha yuav tsum tau qha kuas mej txawj ua dlejnum le caag, mej txhaj le yuav paub ua. Txujkev ua Vaajtswv teg dlejnum yog nyag muaj nyag lub tswvyim tabsis suavdlawg puavleej yog koom nrug Yexus Khetos tuab lub cev.

Yog hastas koj coj koj lub tswvyim kws Vaajtswv pub rua koj lug ua Vaajtswv teg dlejnum es tsi txhob ntshai, tabsis casle ca sab rua teg dlejnum ntawd, Vaajtswv Txujlug yuav fuamvaam ntau heev txug peb Tswv Yexus Khetos rua lub nplajteb kws poob rua txujkev txhum ntau heev le lawm.

II. Vaajtswv hu peb txhua tug, txhawm yog tug laug losyog tug hluas, txawm yog

tug muaj lub tswvyim, txawm yog tug kawm ntawv sab, txawm yog tug txawj tug ntse losyog tug muaj koob muaj npe, lug ua lawv le Vaajtswv txujlug saamfwm tseg kuas “…peb ca le moog muab txhua tug lug ua Vaajtswv cov thwjtim…” nyob rua huv lub nplajteb nuav. Txawm Mauxes yuav nrhav tswvyim lug has kuas nwg tsi txhob tau moog ua Vaajtswv teg dlejnum los Vaajtswv yog tug paab nwg. Peb yuav nrhav tswvyim lug kuas peb tsis txhob tau moog ua Vaajtswv teg dlejnum los Vaajtswv yog tug yuav paab peb. Ntau zag peb yuav hastas:

· Vaajtswv, Kuv laug heev lawm, hab kuv yuav ua tsi tau dlaabtsi rua koj lawm. Vaajtswv yuav teb koj tas, Kuv yog tug pub koj muaj sa nyob ntau xyoo lug txug naj nub nwgnuav hab yuav siv koj tej kev txawj ntse kws koj muaj lug lawm rua tej lub sijhawm zoo le nuav. Yog le ntawd kuv tseem tsi tau pub koj moog su.

· Vaajtswv, kuv tsi muaj lub tswvyim kws yuav txawj xaav le lwmtug. Vaajtswv yuav teb koj tas, Kuv yog tug tsim koj. Thaum koj tseem nyob huv koj nam lub plaab, kuv paub txhua yaam txug koj hab koj txujkev ua tau hab tsi tau. Kuv yog tug Tswv, kuv yeej tsi yuamkev le. Txawm yuav muaj xwmtxheej le caag los koj yeej ua tau rua lub sijhawm nuav.

· Vaajtswv, kuv tsi muaj lub tswvyim kws yuav moog ua tau rua tuabneeg nyam kuv. Vaajtswv yuav teb koj tas, Koj tsuas yog yuav le kuv has xwb. Kuv twb siv tug muag kaug, tug ua vaajtsev, tug ua tsevntaub, tug nuv ntseg, tug sau se hab cov tuabneeg nyob huv nplajteb nuav lug qha kuv txujlug tseeb lawm.

· Vaajtswv, Kuv nyuam qhuav lug ntseeg tshab, kuv tsi tau paub txujkev ntseeg zoo. Vaajtswv yuav teb koj tas, Kuv yog qhovtseeb, yog txujkev hab yog txujsa. Muab koj txujkev ca sab rua kuv. Kuv twb muaj ib cov tuabneeg nyob huv lub Tuamtsev nuav lug qha koj lawm, yog le ntawd koj ca le kawm ntawm puab. Tabsis yaam kws koj kawm tau, koj yuav tsum coj lug moog ua lug ntawm tej lug kws koj has hab tej yaam kws koj xaav.

· Vaajtswv, Kuv tsi txawj ua ntau yaam. Kuv tsi txawj hu nkauj, kuv tsi txawj cob qha. Kuv yuav ua le caag? Vaajtswv yuav teb koj tas, Kuv twb pub tswvyim yog koobmoov kws yog lug ntawm Vaajntsujplig Dlawbhuv rua koj lug moog paab tsaajtawm Txujmoo Zoo txug Vaajtswv lub tebchaws. Yog le ntawd, koj ca le kawm, xyum, koj txhaj le yuav paub.

· Vaajtswv, Kuv tsis muaj zug le lawm. Vaajtswv yuav teb koj tas, Kuv yog koj lub zug. Yog koj vaam txug kuv, koj yuav yaa le tug dlaav, koj yuav tsis qaug zug, koj yuav moog taug kev, koj yuav tsi tsaus muag le.

Yog le ntawd, tsi txhob nrhav lwm lub tswvyim lug teb Vaajtswv. Koj ca le noog Vaajtswv lug. Ntau zag Vaajtswv yuav haslug rua peb lug ntawm tej lug ntxhis. Tej zag nws yuav has lug ntawm tej tug mivnyuas, lug ntawm zaaj nkauj, lug ntawm cov lug qhuab qha, lug ntawm tej phau ntawv, lug rua huv peb lub sab, lug ntawm peb tug phoojywg, los yog lug ntawm tej lub sijhawm. Peb yuav tsum tig pobntseg noog.

Muaj ib mo, muaj ib tug xibfwb qha ntawv taabtom ua nwg cov ntawv yuav coj moog qha nwg cov tub kawm ntawv. Thaum nwg saib nwg tej ntawd yuav tag, nwg pib muab ib cov povtseg rua lub thoob khibnyiab – tabsis nwg pum ib phau ntawv kws twb tsi yog sau rua nwg. Thaum nwg muab qheb nyeem cov ntsab lug sau tas, “The needs of the Congo Mission.”

Tug xibfwb qha ntawv nuav pib nyeem ntxiv ua caag cov ntsab lug sau ntxiv tas: “The need is great here. We have no one to work the northern province of Gabon in the central Congo. And it is my prayer as I write this article that God will lay His hand on one - one on whom, already, the Master's eyes have been cast - that he or she shall be called to this place to help us." The professor closed the magazine and wrote in his diary: "My search is over.”

Tug xibfwb qha ntawv nuav lub npe hu uas Albert Schweitzer. Phau ntawv kws xaa tuaj yog tag yog rua lwmtug, tabsis lwmtug muab tso yuamkev rua nwg lub mailbox. Txujmoo, nwg tug tus vaajtsev muab tso rua sau nwg lub rooj, txujmoo, nwg muab coj lug nyeem. Yog le ntawd Dr. Schweitzer txhaj le dlhau lug yog ib tug “humanitarian – paab tuabneeg” kws ua dlejnum zoo kawg nkaus nyob rua tam nuav.

III. Mauxes tig moog noog saib Vaajtswv has le caag ntawm tsob ntoo kws cig kub nyab tsis kub le saib Vaajtswv has le caag. Yog hastas peb yuav cas Vaajtswv ua tug coj peb kev, peb yuav tsum tig peb lub pobntseg lug noog saib Vaajtswv has le caag rua peb. Yog le ntawd, uantej kws peb yuav ua tau le nuav, yuav tsum muaj ob yaam uantej. Ib, peb yuav tsum paub ua lub neej yog paub ntshai Vaajtswv. Mauxes yeej tsi nov Vaajtswv tej lug yog Mauxes tsi paub fwm tug kws haslug rua nwg. Yog peb tsi paub ua lub neej paub ntshai Vaajtswv es peb tsuas naj nub qhuas txug peb tug kheej xwb ces nuav yog ib qhov kws peb tsis paub fwm Vaajtswv lawm.

Ob, peb yuav tsum txu fwjchim lug noog yaam kws qha rua peb. Yog peb hastas, peb txawj ua peb lawm, ces yog peb tsi noog lug lawm. Peb yuavtsum totaub tas Vaajtswv yuav siv lwmtug lug qha peb. Nwg yuav siv tej tug kws tsi muaj lug has. Nwg yuav siv tug kws yog yug tug yeebncuab. Nwg yuav siv tug mivnyuas yaus. Nwg yuav siv tug kws haslug tsi tshuam meejpem. Peb yuav tsum muab peb tej kev txawj kev ntse kawg cas es tig peb lub pobntseg lug noog saib lwmtug has le caag. Yog peb tsi tig pobntseg noog, ces thaum Vaajtswv haslug, peb yuav tsi nov.

Vaajtswv twb khaiv Mauxes hab cov xibfwb cev Vaajtswv lug nyob rua Vaajlugkub Qub lawm. Nwg khaiv nwg tug Tub Yexus lug tuag sau tug ntoo khaublig lug theej lub nplajteb nuav txujkev txhum. Thaun Yexus kovyeej txujkev txhum, kev tuag hab dlaab ntxwgnyoog, Yexus khaiv nwg cov thwjtim moog qha Nwg Txujmoo Zoo rua lub nplajteb kuas txhua tug txhaj le tau txujkev cawmdlim lug ntawm Nwg lub npe. Yexus has ntawm Yauhaas 20:21 “Leejtxiv khaiv kuv lug le caag, kuv yuav khaiv mej moog ib yaam le ntawd. Ces nwg txawm tshuab paa rua puab hab hastas, ‘txais Vaajntsujplig Dlawbhuv……..” (NIV) Lug ntawm cov lug kws Yexus cogtseg rua nwg cov thwjtim, qhov nuav qha tau tas nwg yuav tsis ca puab moog puab tug kheej ib zag le. Txawm puab yuav moog ib lub zog rua ib lub zog qha txug Yexus txujkev sawv ntawm txujkev tuag rov lug los nwg yuav nrug nraim puab lug ntawm Vaajntsujplig Dlawbhuv. Vaajntsujplig Dlawbhuv yuav ua tau txujci tseemceeb lug ntawm puab. Vaajntsujplig yuav pub puab sau tau Vaajtswv Txujlug nyob rua ntawm phau Vaajlugkub Tshab. Vaaj Ntsujplig Dlawbhuv yuav qha puab txhua yaam hab ua kuas puab rov ncu txug txhua yaam kws Yexus tau has hab qha lawm. Vim yog le nuav tug Thwjtim Paulus txhaj le has ntawm

1 Kauleethaus 2:13 “Peb haslug tsis yog tej lug txawjntse kws tuabneeg qha, tabsis yog lug ntawm ntsujplig, qha lug ntawm tug tseem ntsujplig kws yog ntsujplig cov lug.” (NIV). Yog le ntawd, thaum cov thwjtim moog qha Vaajtswv Txujmoo Zoo, Vaajntsujplig Dlawbhuv yeej nrug nraim puab txhua lub sijhawm.

Yexus khaiv cov thwjtim moog qha Txujmoo zoo. Uantej Yexus yuav moog sau ntuj ceebtsheej, Nwg has kuas peb “…peb ca le moog muab txhua tug lug ua Vaajtswv cov thwjtim…” Peb yog khaiv lug ntawm Yexus lug moog qha txug Nwg txujkev sawv ntawm txujkev tuag kws yog pub tau txujsa hab kev zaamtxim. Cov thwjtim tau Vaajntsujplig Dlawbhuv. Peb los yeej tau Vaajntsujplig Dlawbhuv ib yaam nkaus kws ua rua txhua tug ntseeg qha tau rua lwmtug txug peb tug Camwseej Tswv Yexus Khetos. Nuav zoo nkaus le thaum Vaajtswv khaiv Mauxes moog cawm cov Yixalayees, hab zoo nkaus le Yexus cov thwjtim moog txhua qhovchaw qha txug Yexus Khetos. Thov kuas peb tug Cawmseej Tswv Yexus Khetos pub peb muaj pevxwm hab kub sab lug - lug moog qha txug txujkev kws tau txujsa ntev dlhawv moog ibtxhis lug ntawm Tswv Yexus Khetos lub npe. Yog thaum twg Vaajtswv hastas, “Kuv khaiv koj moog,” koj txhaj le yuav teb tau le Xamuyees teb tas, “…..Speak, for your servant is listening.- …haslug, koj tug tubkhaiv taabtom noog” (1 Samuel 3:10) And you be able to say with confidence like Isaiah , “….Here am I. Send me! – Koj yuav muaj peevxwm has tau le Yaxayas hastas, “Kuv nyob ntawm nuav, khaiv kuv!” (Isaiah 6:8).

Thov kuas Vaajtswv txujlug pub rua peb suavdlawg totaub hab tau nyob kaajsab lug rua ntawm tswv Yexus Khetos lub npe. Peb txhua tug kws yog Vaajtswv cov mivnyuas peb suavdlawg has: Asmees.