Lub neej tsimnyog yog tus ntseeg

Khaulauxais 1:1-14

1. Greetings:
a.). Nyob zoo txhus tus ntawm Tswv Yexus lub npe! Thov Vajtswv foom koobhmoov rau peb thiab thov Vajtswv nrog nraim peb txhua tus. Asmees.

b). Hnub no Xibhwb Ntxoov Yias tsis nyob lawm, tiamsis nws sau daim lus qhuabqhia no rau kuv coj tuaj qhia rau peb kev hawm Vajtswv hnub no. Kuv cia siab haistias lub sijhawm peb mloog Vajtswv Txojlus no, Vajtswv yuav foom koob hmoov rau peb txhau tus.

2. Paul gave thank to God and prayed for help to the Christians:

a) Vajtswv Txojlus Khaulauxais tshooj ib qhia rau peb haistias Pawg-ntseeg nyob hauv lub moos Khaulauxais tsis yog Xibhwb Povlauj pib; tiamsis tus uas pib pawg-ntseeg no thiab Xibhwb Povlauj nkawv ua haujlwm uake.

b) Thaum Xibhwb hnov txog Pawg-ntseeg no nws zoo siab heev li thiab nws nco ntsoov thov Vajtswv pab cov ntseeg.

c) Tsis tas li no xwb, Xibhwb Povlauj nco ntsoov qhuas txog cov ntseeg txojkev ntseeg, lawv lub neej sib hlub, thiab Xibhwb Povlauj hais lus txhawb lawv lub zog kom lawv muab siab npuab Tswv Yexus heev ntxiv.

3. Paul prayed to God for the Christians to live worthy life:

a) Xibhwb Povlauj thov Vajtswv pab kom cov ntseeg txi txiv rau txhua yam dejnum. Xibhwb Povlauj xav kom cov ntseeg hauv Khaulauxais ua lub neej zoo kom phim qhov lawv yog Vajtswv cov menyuam.

b) Xibhwb Povlauj thov Vajtswv pab kom lawv paub Vajtswv zoo heev ntxiv. Xibhwb thov Vajtswv pab kom lawv muaj zog rau ntawm Vajtswv.

4. Salvation only come thrug Christ:

a) Tsis tas li no xwb, Xibhwb Povlauj hais kom lawv yuav tsum nco ntsoov haistias Vajtswv tau cawm lawv dim ntawm qhov tsaus ntuj lawm.

b) Vajtswv tau coj lawv los nyob ntawm Tswv Yexus txojkev kav lawm. Tswv Yexus yog tus kav cov ntseeg. Tswv Yexus yog lawv tus Cawmseej. Vajtswv cawm tau cov ntseeg Yexus rov los ua Vajtswv tug lawm. Vajtswv zam txim rau txhua tus ntseeg Yexus lawm.

5. Closing:

a) Cov kwvtij, peb ua Vajtswv tsaug uas Vajtswv tau coj peb los ua Vajtswv cov menyuam, thiab Vajtswv tau zam txim rau peb lawm. Peb yog ib tsevneeg, yog ib qhov tseem ceeb peb yuav tau nco ntsoov thov Vajtswv rau peb Pawg-ntseeg kom peb txawj sib pab, txawj sib txhawb zog thiab sib ntuas kom peb txawj ua neej tsimmyog qhov peb ntseeg Vajtswv.

b) Ib qhov tseem ceeb ntxiv, peb yuav tau tabmeeg ntseeg Yexus thiab ib leeg qhia rau leeg tsis tseg tsis tu haistias Vajtswv twb cawm tau peb tawm ntawm qhov tsaus ntuj los nyob ntawm qhov kaj lawm es peb tsis txhob tig rov mus ua lub neej nyob hauv qhov tsaus ntuj.

c) Yog peb niaj hnub nco ntsoov thiab hnov li no peb yuav zoo siab heev. Yog peb pheej hnov Vajtswv tej lus no, Vajtswv yuav ua rau peb txawj ua Vajtswv tsaug, peb yuav ua txhua yam rau Vajtswv tau ntsejmuag, thiab peb yuav tabmeeg ntseeg Vajtswv heev ntxiv.

d) Tsis tas li no xwb, peb yuav txawj cia Vajtswv ua peb lub zog rau peb lub neej. Peb yuav muaj lub siab tawv thiab peb yuav nyiaj taus txhua yam kev tsis zoo, vim haistias Vajtswv nrog nraim peb nyob.

e) Peb yuav tau rau siab tuaj kawm Vajtswv Txojlus thiab tuaj hawm Vajtswv. Yog peb tsis paub Vajtswv Txojlus zoo peb yuav tsis paub Vajtswv zoo, tiamsis thaum peb paub Vajtswv Txojlus, peb yuav paub Vajtswv Txojlus zoo; thaum peb paub Vajtswv zoo, Vajtswv yuav ua rau peb txojkev ntseeg ruaj khov thiab peb yuav ua tau lub neej tsimnyog peb txojkev ntseeg.

f) Thov Vajtswv txojkev foom koobhmoov rau peb txhua rau ntawm Tswv Yexus lub npe. Asmees.