Vaj Ntsujplig tus Dawbhuv tes dejnum

Yauhas 16:5-11

 

Greetings:  Nyob zoo cov kwvtij txhua tus!  Thov Vajtswv foom koob hmoov rau nej thiab thov Tswv Yexus txojkev hlub nrog nraim nej txhua tus nyob.  Asmees.

Text:  Yauhas 16:8

Prayer:

 

1.         Introduction:
            a.         Hnub no yog hnub peb hawm Vajtswv nco txog Hnub Pentecost – Hnub uas thaum uas Vajtswv txib Vaj Ntsujplig tus Dawbhuv los rau cov thwjtim thiab cov ntseeg Yexus. 

 

b.         Kuv yuav qhuabqhia txog Vaj Ntsujplig tus Dawbbuv txoj haujlwm.  Txoj Moo Zoo hnub no qhia rau peb haistias Vaj Ntsujplig tus Dawbhuv muaj peb txoj haujlwm tseem ceeb kawg nkaus uas Tswv Yexus yuav txib Vaj Ntsujplig tus Dawbhuv los ua nyob hauv ntiajteb no.

 

            c.         Peb txoj haujlwm uas tseem ceeb kawg nkaus ntawd yog 1). Vaj Ntsujplig tus Dawbhuv yuav los qhia neeg ntiajteb haisitas sawvdaws yog muaj txim txhaum, vim sawvdaws tsis ntseeg Yexus  2). Vaj Ntsujplig tus Dawbhuv yuav qhia haistias sawvdaws yog neeg tsis ncajncess  3). Vaj Ntsujplig tus Dawbhuv yuav los qhia rau neeg paub haisitas tus uas kav lub ntiajteb no tau raug txiavtxim lawm.

 

2.         Why send the Holy Spirit?
            a.         Tswv Yexus hais rau cov thwjtim haistias Nws yuav tsis nrog lawv nyob lawm, vim haistias tsis ntev Nws tes dejnum uas Vajtswv txib Nws los ua Nws yuav muab ua tiav sai sai.  Thaum Nws tes dejnum tiav, Nws yuav tsis nrog cov thwjtim nyob zoo li qub lawm.

 

            b.         Tswv Yexus hais rau lawv haistias Nws yuav txib Vaj Ntsujplig tus Dawbhuv los nrog lawv nyob thiab Vaj Ntsujplig tus Dawbhuv yuav los qhia lawv ntxiv txog txhua yam uas Tswv Yexus twb tau qhia rau lawv lawm.

 

            c.         Tswv Yexus hais rau cov thwjtim haistias qhov uas Tswv Yexus txib Vaj Ntsujplig tus Dawbhuv los nrog cov thwjtim nyob yog qhov zoo rau lawv.  Nws yog qhov zoo rau lawv vim haistias Tswv Yexus tus tibneeg tsuas nyob tau ib qhovchaw xwb, tiamsis thaum Vaj Ntsujplig tus Dawbhuv los, Tswv Yexus yuav los nrog cov thwjtim thiab cov ntseeg thoobplaws ntiajteb nyob dhau los ntawm Vaj Ntsujplig tus Dawbhuv.  Qhov no muaj tseeb raws li Tswv Yexus tau hais tseg rau hauv Mathais 28:20, haistias, “Kuv yuav nrog nraim nej nyob mus txog hnub uas lub ntiajteb no kawg….”  Zaum no Tswv Yexus nrog cov thwjtim thiab cov ntseeg nyob dhau los ntawm Vaj Ntsujplig tus Dawbhuv. 

 

3.         Vaj Ntsujplig tus Dawbhuv peb txoj haujlwm:
            a.         Vaj Ntsujplig tus Dawbhuv txoj haujlwm ib yog Nws yuav los qhia neeg ntiajteb haisitas sawvdaws yog muaj txim txhaum, vim sawvdaws tsis ntseeg Yexus.  Qhov no txhais tau yooj yooj yim haistias Vaj Ntsujplig tus Dawbhuv yog tus yuav los coj neeg los ntseeg Tswv Yexus.  Tiamsis yog tus twg tsis los ntseeg Yexus, tus ntawd yog neeg txhaum, thaum kawg nws yuav raug txim.  Tsuas yog tus ntseeg Tswv Yexus thiaj tsis muaj txim, vim haistias Vajtswv yuav zam txim rau tus ntseeg!  God wants everyone to know this!

 

            b.         Txoj haujlwm ob uas Vaj Ntsujplig tus Dawbbuv yuav los ua yog Nws yuav qhia neeg ntiajteb haistias sawvdaws yog neeg tsis ncajncess.  Vaj Ntsujplig yuav qhia kom neeg ntiajteb paub tseeb haistias neeg ntiajteb tsis yog neeg ncajncees, Tswv Yexus thiaj yog tus ncajncees xwb.  Txhua tus yuav tau los ntseeg Yexus, sawvdaws thiaj yuav yog neeg ncajncees.  Tus uas tsis los ntseeg Yexus, nws yuav raug txiavtxim, vim nws tsis yog neeg ncajncees!  God wants everyone to know this!

 

            c.         Txoj haujlwm peb yog Vaj Ntsujplig tus Dawbhuv yuav los qhia rau neeg paub haisitas tus uas kav lub ntiajteb no tau raug txiavtxim lawm.  Tswv Yexus kovyeej Dabntxwgnyoog lawm.  Dabntxwgnyoog lub hwjchim yuav kav tsis tau tus ntseeg Yexus.  Sawvdaws tsis tsis txhob ntseeg Dabntxwgnyoog thiab tsis txhob ua Dabntxwgnyoog qhev.  Sawvdaws cia li los ntseeg Tswv Yexus, vim haistias Tswv Yexus yog peb tus Cawmseej.  Yog tus twg tsis ntseeg Yexus, nws tseem xav ntseeg Dabntxwgnyoog, tus ntawd yuav raug txiavtxim thaum lub ntiajteb no kawg.  God wants everyone to know this!

 

 

4.         Vaj Ntsujplig tus Dawbhuv los nyob hauv cov ntseeg:
            a.         Lub sijhawm Tswv Yexus nrog cov thwjtim nyob, Vaj Ntsujplig tus Dawbhuv tseem tsis tau los, vim haistias Tswv Yexus tes dejnum tsis tau tiav.  Tiamsis tom qab uas Tswv Yexus tau tuag thiab sawv hauv qhov tuag rov los txhiv neeg ntiajteb lub txim lawm, Tswv Yexus tau nce mus saum ceebtsheej ntuj.  Vaj Ntsujplig tus Dawbhuv tau los nyob hauv ntiajteb no lawm.

 

            b.         Hnub Pentecost, Vaj Ntsujplig tus Dawbhuv los rau ntawm cov thwjtim thiab cov ntseeg zoo li hluavtaws.  Thaum Vaj Ntsujplig tus Dawbhuv los nyob hauv cov thwjtim, cov thwjtim txawm paub Vajtswv zoo thiab lawv pib qhia Vajtswv Txojlus rau cov tsis ntseeg.  Hnub ntawd cov tsis ntseeg coob tug tau hnov Vaj Ntsujplig cov lus qhia dhau los ntawm cov thwjtim.  Lawv lees lawv tej kev txhaum thiab lawv ua kevcai ntseeg Tswv Yexus ua lawv tus Cawmseej.

 

            c.         Thaum koj thiab kuv hnov Vajtswv Txojlus, Vaj Ntsujplig tus Dawbhuv coj peb los ntseeg Tswv Yexus ua peb tus Cawmseej.  Losyog cov menyuam yaus, thaum lawv ua kevcai ntxuav, Vaj Ntsujplig tus Dawbhuv los nyob hauv lawv, lawv thiaj paub haistias Tswv Yexus yog lawv tus Cawmseej.  Hnub Vaj Ntsujplig coj peb los ntseeg Yexus, Vajtswv zam peb lub txim thiab peb dim Vajtswv txojkev rau txim.  Qhov uas peb txawj los ntseeg Tswv Yexus, thiab qhov peb yog tibneeg dawbhuv thiab dim Vajtswv txojkev rau txim, nws tsis yog peb ua ntawm peb tus kheej, tiamsis yog Vaj Ntsujplig tus Dawbhuv los qhia rau peb thiab los ua pub rau peb. 

 

            d.         Cov kwvtij txhua tus, peb nco ntsoov ua Vajtswv tsaug thiab qhuas Vajtswv, rau qhov Vaj Ntsujplig tus Dawbhuv tau coj peb los ntseeg Tswv Yexus ua peb tus Cawmseej, coj peb los txais Vajtswv txojkev zam txim thiab txais kev ywjphem ntawm Dabntxwgnyoog,  nimno peb thiaj yog neeg ncajncees thiab yog neeg dawbhuv rau Vajtswv dhau los ntawm Tswv Yexus lub npe.

 

e.         Koj nco ntsoov haistias koj yog Vajtswv ib tug menyuam, koj yuav tau tabmeeg kawm Vajtswv Txojlus, cia Vajtswv tus Ntsujplig kav koj lub siab, qhia koj ua neej thiab coj koj txoj hauv kev rau txhua yam koj yuav ua thiab hais kom koj ua tau lub neej zoo rau Vajtswv tau ntsejmuag thiab tau koobmeej.  Thaum no koj txojkev ntseeg los yuav ruaj khov kho, thiab koj yuav zoo siab hlo mus qhia Vajtswv Txojlus rau cov tsis ntseeg.  Vaj Ntsujplig yuav siv koj yuav ua haujlwm dhau los ntawm koj mus coj cov tsis neeg los ntseeg Yexus, los txais yuav Tswv Yexus txojkev ncajncees thiab txais txojkev ywjpheej ntawm Dabntxwgnyoog kom lawv yuav tsis raug txim hnub kawg, tiamsis yuav tau txojsia ntev mus ibtxhis.

 

f.          Thov Vajtswv tus Ntsujplig tus Dawbhuv yuav nrog nraim nej nyob mus ibtxhis rau ntawm Tswv Yexus lub npe.  Asmees.