Yuav ua li cas peb thiaj muaj kev kaj siab?

Filipis 4:1-13, Kxh. Ntxoov Yias Vaj

Greetings: Thov Vajtswv foom koob hmoov rau nej, thiab thov Vajtswv txojkev haumxeeb kav nej txhua tus lub siab rau ntawm Tswv Yexus lub npe. Asmees.

Text: Filipis 4:6-7

Thov Vajtswv:

1. Introduction:
a. Vajtswv Txojlus uas hnub no Kuv npaj coj tuaj qhia rau peb kev hawm Vajtswv muaj lub npe hu haistias, “Yuav ua li cas peb thiaj muaj kev kaj siab?”

b. Cov kwvtij txhua tus, peb txhua tus xav muaj txojkev kaj siab. Yeej tsis muaj leejtwg xav muaj kev ntxhov siab losyog kev nyuaj siab li.

c. Niaj hnub no muaj ntau tus tibneeg muaj kev ntxhov siab thiab muaj kev nyuaj siab vim yog kev tshuav nuj tshuav nqis losyog, menyuam tsis mloog hais losyog, niam txiv tsis sib hlub losyog, kev mob kev nkeeg losyog thiab lwm yam ua rau lawv tsis muaj kev kaj siab. Tej no thiab ntau yam hauv lub ntiajteb no ua rau peb ntxhov siab thiab ua rau peb nyuaj siab. Tiamsis peb nco ntsoov haistias tej kev ntxhov siab no tsis muaj ib yam dabtsi tshiab, txhua yam kev ntxhov siab uas nimno peb muaj, cov neeg thaud tau raug ib yam nkaus thiab. Thaum peb muaj kev ntxhov siab, yeej tsis muaj leejtwg losyog ib yam tshuaj twg yuav daws tau peb lub siab ntxhov ntawd, tsuas yog Vajtswv ibleeg nkaus xwb thiaj yuav pab tau peb lub siab.

d. Nej nco ntsoov haistias dabntxwgnyoog tsis pub kom peb muaj kev kaj siab. Lub ntiajteb no tsis pub kom peb muaj kev kaj siab. Lub txim txhaum uas yug nrog peb los yeej tsis pub kom peb muaj kev kaj siab. Cov no tawmtsam peb txhua hnub. Vajtswv Txojlus qhia rau peb haistias peb tus yeebncuab tsis yog tibneeg, tiamsis yog cov thawjcoj ntawm sab ntsujplig. Yog li ntawd, peb yuav tau muab Vajtswv tej cuabyeej tawmtsam peb thiaj kovyeej, rau qhov Vajtswv ibleeg nkaus xwb thiaj muab tau lub siab kaj rau peb.

2. Vajtswv Txojlus qhia li cas hais txog kev kaj siab?
a. Yuav ua li cas peb thiaj muaj tau kev kaj siab?

b. Hnub no Vajtswv Txojlus Filipis 4 qhia rau peb haistias peb yuav tau ua li no peb thiaj muaj txojkev kaj siab nyob rau hauv peb lub neej raws li qhov uas Vajtswv xav kom peb muaj:

Ib, Vajtswv Txojlus ntuas peb haistias peb yuav tau zoo siab (rejoice) rau tus Tswv txhua lub sijhawm. Lo lus haistias “zoo siab – rejoice” no tsis yog hais txog tej yam uas peb zoo siab es ua rau peb luag – he he, nws tsis yog li no. Tiamsis (rejoice) yog hais txog txojkev zoo siab uas nyob tob tob hauv peb lub neej uas ua rau peb zoo siab kaj siab lug, vim haistias peb muaj kev cia siab rau tus Tswv, thiab peb tau txais yam khoom zoo los ntawm tus Tswv. Thaum muaj kev cia siab li no rau ntawm tus Tswv thiab nrog tus Tswv sib raug zoo li no lawm, tej kev ntxhov siab me me ntawm kev noj kev haus, kev mob kev nkeeg yeej ua tsis tau rau koj ntxhov siab, vim haistias koj lub siab nyob ntawm tus Tswv lawm. Peb yuav tau zoo siab rau tus Tswv mus li, rau qhov Nws tau zam peb lub txim thiab tau coj peb los ua Nws cov menyuam lawm. Yog koj nco ntsoov li no, koj yuav zoo siab thiab kaj siab lug, tsis muaj kev ntxhov siab, rau qhov koj lub siab nyob ntawm tus Tswv, not other things.

Ob, Vajtswv Txojlus ntuas peb haistias peb yuav tau ua tus tibneeg muaj siab mos siab hmuag – gentleness. Tus tibneeg muaj siab mos siab hmuag losyog gentle yog tus tibneeg muaj lub siab zoo xav pab tibneeg, hlub tibneeg, ua zoo rau tibneeg. Tswv Yexus yog tus tibneeg zoo li ntawd thaum Nws los nyob hauv lub ntiajteb no. Tswv Yexus nqis los pab peb, Nws hlub peb heev thiab Nws ua zoo rau tibneeg txhua tus. Nws tuag rau txhua tug! Peb yog Vajtswv cov menyuam, Vajtswv hais kom peb muaj lub siab zoo li Tswv Yexus. Qhov peb xyaum ua tus tibneeg siab mos siab hmuag yuav ua rau peb kaj siab lug, vim haistias peb ua neej nyob peb muaj Vajtswv lub homphiaj uas xav pab tibneeg, hlub tibneeg thiab xav ua zoo rau tibneeg nyob hauv peb lub siab. Cia Vajtswv hloov koj lub siab kom koj muaj lub siab mos siab hmuag!

Peb, Vajtswv Txojlus ntuas peb haistias peb tsis txhob txhawjxeeb txog ib yam dabtsi li. Vajtswv tsis pub peb txhawjxeeb vim haistias Vajtswv yog peb Leejtxiv, Nws yuav saib xyuas peb. Vajtswv Txojlus nyob hauv Mathais qhia rau peb haistias peb tseem ceeb rau Vajtswv tshaj txhua yam tsiaj txhu, tej ntawd thaum txog caij twb tau noj tau haus. Vajtswv yeej yuav saib xyuas peb zoo tshaj tej ntawd. Kev txhawjxeeb muab tsis tau lub siab kaj rau peb. Yog peb ua tib zoo saib, kev txhawjxeeb yog kev tsis cia siab rau Vajtswv. Peb tej menyuam thaum lawv tseem nrog peb nyob lawv tsis nyuaj siab, vim lawv cia siab rau peb ua niam thiab txiv yuav saib xyuas lawv. Ib yam nkaus li no koj cia Vajtswv ua tus Tswv ntawm koj lub neej koj thiaj muaj kev kaj siab. Vajtswv Txojlus ntuas kom peb tsis txhob txhawjxeeb txog lub neej tom hauv ntej, vim haistias tom hauv ntej los Vajtswv yuav saib xyuas peb li hnub no thiab. Yog li, Vajtswv thiaj haistias peb tsis txhob txhawj, tiamsis cia siab rau Vajtswv. Koj cia siab rau Vajtswv hnub no!

Plaub, Vajtswv Txojlus ntuas peb haistias txhua yam nyob hauv peb lub neej, tej uas koj xav tau losyog tej uas koj twb tau lawm es koj xav ua Vajtswv tsaug, koj cia li coj txhua yam no mus qhia rau Vajtswv. Vajtswv nqi lus no yog ntuas kom peb muab txhua yam ntawm peb lub neej tso rau Vajtswv tus Tswv tsomkwm thiab tus kav. Vajtswv Txojlus haistias thaum Vajtswv yog tus Tswv kav peb lub siab lawm, Vajtswv txojkev haumxeeb uas zoo tshajplaws tej uas neeg totaub yuav los kav koj lub siab thiab lub hlwb xav. Thaum no koj yuav tau zoo nyob kaj siab lug. Ntau zaug peb ntxhov siab vim yog peb xav ua tus Tswv ntawm peb tus kheej. Nco ntsoov haistias peb tsis yog tus Tswv ntawm peb tus kheej, Vajtswv yog tus Tswv.

Tsib, Vajtswv Txojlus ntuas ntxiv haistias peb yuav tau muab peb lub siab xav rau tej uas tseeb, tej uas tseem ceeb, tej uas yog, tej uas dawbhuv, tej uas ntxim hlub, thiab tej uas ntxim saib losyog tej uas zoo nkauj thiab tsimnyog qhuas xwb. Thaum koj lub siab xav rau yam phem thiab tej uas tsis zoo ces koj thiaj ntxhov siab. Thaum peb lub siab nyob ntawm qhov zoo thaib ntawm yam zoo ces peb lub siab yuav kaj. Vajtswv Txojlus yeej yog lus tseeb, yog peb mloog Nws lus, Nws yuav ua rau koj lub siab yuav kaj tiag tiag.

Rau, Vajtswv Txojlus ntuas peb haistias yuav tau muab tej uas peb tau kawm los lawm (uas yog Vajtswv Txojlus) siv rau hauv peb lub neej, peb thiaj muaj kev kaj siab. Yog vim li cas Vajtswv Txojlus hais li no? Nws hais li no, rau qhov Vajtswv Txojlus yog Vajtswv lub hwjchim. Thaum peb siv Vajtswv Txojlus lawm, Txojlus yuav kav peb lub siab, Txojlus yuav mus ua dejnum nyob hauv peb, Txojlus yuav hloov peb, thaum no peb yuav muaj lub siab kaj losyog peb yuav tau zoo nyob kaj siab lug.

3. Closing:
a. Kuv cia siab haistias nej yuav khaws Vajtswv cov lus no rau hauv nej lub siab es cia Vajtswv Txojlus tshem nej tej kev ntxhov siab thiab cia Vajtswv Txojlus muab kev kaj siab rau nej.

b. Cov kwvtij, nej nco ntsoov haistias Vajtswv twb zam nej lub txim lawm. Vajtswv yog tus Tswv rau koj lub neej thiab koj txojsia ntawm sab ntsujplig thiab sab nqaijtawv huvsi. Txhua yam koj muaj losyog Vajtswv muab pub rau koj thiab. Vajtswv hais kom peb cia Vajtswv ua tus Tswv ntawm peb tus kheej thiab lub siab lub ntsws rau kev xav ib puas tsav yam lub sijhawm peb nyob hauv ntiajteb no. Dhau los qhov peb cia siab no, Vajtswv txojkev haumxeeb yuav kav peb lub siab thiab peb yuav muaj lub siab kaj mus li.

c. Thaum kawg no thov Vajtswv txojkev haumxeeb yuav los kav nej lub siab kom nej txhua tus tau zoo nyob kaj siab lug rau ntawm Tswv Yexus lub npe. Asmees.