Ua Neej Nrog Kev Zoo Siab

Filipis 4:4-7 (Kxh. Ntxoov Yias Vaj)

Greetings: Thov Vajtswv foom koobhmoov rau nej, hlub nej thiab thov Nws txojkev haumxeeb kav nej lub siab rau ntawm Tswv Yexus lub npe. Asmees

Text: Filipis 4:4-7

Prayer:

1. Introduction:

a. Zaj lus qhuabqhia hnub no hu haistias, “Ua neej nrog kev zoo siab.”

b. Cov kwvtij, lub ntiajteb peb nyob no muaj neeg coob kawg nkaus tsis muaj kev zoo siab. Thaum peb tsis zoo siab lawm, peb tsim ntau tsav ntau yam teebmeem - peb mus ua kev txhaum, peb sib ntau sib tua, peb ibleeg tawmtsam ibleeg, tej niamtxiv xav sib nrauj, niamtxiv menyuam thiab kwvtij neejtsa tsis xav sib hlub, peb mus kev ua phem, peb sib ntxub, peb sib thuam, thiab peb ua kev tsis zoo ntau yam rau lwm tus thiab peb tus kheej. Yog peb ua tib zoo saib, peb yuav pom haistias txhua yam kev tsis zoo hauv lub ntiajteb no yog tshwmsim los ntawm cov neeg tsis zoo siab los xwb.

c. Hnub no koj puas zoo siab? Koj xav haistias yam dabtsi losyog leejtwg thiaj yuav ua tau rau koj zoo siab? Muaj tej txhia neeg xav haistias yog lawv muaj nyiaj ntau, yog lawv noj qab nyob zoo, yog lawv tsis muaj mob tsis nkeeg, yog lawv tej menyuam mloog lus, yog lawv niam lawv txiv hlub lawv, yog lawv tau txoj haujlwm zoo, yog lawv txawj ntse, yog lawv zoo nkauj zoo nraug losyog, losyog, yog lawv tau txhua yam raws li lawv lub siab nyiam siab xav ces lawv yuav zoo siab. Tiamsis peb twb pom haistias muaj ntau tus neeg lawv tau tagnrho tej no, tiamsis lawv tsis zoo siab li. Yog vim li cas?

d. Tsis yog li no xwb, muaj tej txhia neeg lawv txhawj txog lawv lub neej, lawv txhawj txog yav tom hauv ntej, lawv txhawj txog lawv tej nujnqis, lawv txhawj txog kev mob kev nkeeg, lawv txhawj txog lawv tej menyuam, lawv txhawj txog lawv tus pojniam tus txiv, lawv txhawj txog lawv niam lawv txiv thiab tej kwvtij neejtsa, lawv txhawj txog ntau yam ces tej uas lawv txhawj no ua rau lawv tsis muaj kev zoo siab.

e. Peb nco ntsoov haistias thaum peb tsis muaj kev zoo siab, nws tsis yog vim ib yam dabtsi losyog tsis yog vim leejtwg, tiamsis yog vim peb rov ua rau peb tus kheej tsis zoo siab xwb. Nws yog peb nrhiav teebmeem rau peb tus kheej xwb.

f. Yog vim li cas peb tsis muaj kev zoo siab? Peb tsis zoo siab vim yog peb cia ntau yam sab nraum losyog peb cia ib yam dabtsi losyog ib tus twg sab nraum tswj peb lub siab lawm. Peb cia neeg tej lus, peb cia neeg tej neej thiab tej tswvyim nyob sab nraum tswj peb lub siab, ua rau peb lub siab nyob tsis ruaj tsis tu – ua rau peb tsis zoo siab. Peb nco ntsoov haistias kev tsis zoo siab pab tsis tau peb lub neej, nws tsuas muaj rhuav peb lub neej thiab ua rau peb puastsuaj mus xwb.

2. The foundation of our happiness:

a. Rau qhov peb yog Vajtswv cov menyuam, Dabntxwnyoog yuav siv kev mob kev nkeeg, kev tsis sib haumxeeb, kev txhawjxeeb los ua kom peb tsis txhob zoo siab rau peb lub neej. Tej zaum Dab yuav siv peb tsevneeg, peb tej kwvtij neejtsa txheeb ze los ua kom peb tsis txhob zoo siab. Tiamsis peb tsis txhob cia tej no los tshem peb txojkev zoo siab tawm ntawm peb mus. Vajtswv tau zam peb lub txim thiab pub ntau yam tswvyim zoo rau peb kom peb muaj tau lub neej zoo siab thaum peb tseem muaj txojsia nyob no. Peb yuav tsum txawj siv Vajtswv tej tswvyim thiab cia Vajtswv tswj peb lub siab raws li Vajtswv hais, raws li Vajtswv lub homphiaj, peb thiaj muaj kev zoo siab.

b. Vajtswv Txojlus Filipis tshooj 4 haistias, “Peb yuav tsum zoo siab rau tus Tswv txhua lub sijhawm.” Nqe Vajluskub no yog cov tshuaj losyog lub hwjchim kho peb lub neej tsis muaj kev zoo siab kom peb zoo siab. Xibhwb Povlauj haistias, “Peb yuav tsum zoo siab rau tus Tswv txhua lub sijhawm.” Thaum peb zoo siab rau ntawm tus Tswv, yeej tsis muaj ib yam dabtsi losyog ib tus twg yuav los tshem tau peb txojkev zoo siab tawm ntawm peb mus, rau qhov peb lub siab nyob ntawm tus Tswv lawm. Muaj ib zaj movie kuv saib, muaj ib tus tub hais rau ib tus ntxhais haistias, “Koj puas kam ua kuv tus hlub? Tus ntxhais teb haistias, ‘Kuv ua tsis tau, rau qhov kuv lub siab nyob ntawm lwm tus lawm.’” Tus ntxhais teb tau zoo kawg nkaus!

c. Yog koj txojkev zoo siab nyob ntawm tus Tswv lawm, yog koj muab koj lub siab rau tus Tswv lawm, tej uas neeg ua tsis haum koj siab losyog tej koj tsis nyiam yeej ua tsis tau ua rau koj txhawj losyog ntxhov siab losyog chim thiab npautaws, rau qhov koj lub siab tsis nyob ntawm tej ntawd, tiamsis Vajtswv txojkev haumxeeb kav koj lub siab. Thaum Vajtswv txojkev haumxeeb kav koj lub siab lawm, koj yuav tau zoo nyob kaj siab lus. Tiamsis yog koj txojkev zoo siab yog nyob ntawm koj lub neej, ntawm koj tej dejnum, ntawm koj tej metub menyuam, ntawm koj niam koj txiv, ntawm koj tej kwvtij neejtsa, losyog ntawm khoom ntiajteb, koj yeej muaj tsis tau txojkev zoo siab txhua lub sijhawm; rau qhov tej no tsuas muab tau kev zoo siab ib ntus xwb. Tos ntau tus neeg tsis muaj kev zoo siab, vim yog lawv zoo siab thiab cia siab rau tej no xwb, lawv tsis zoo siab losyog cia siab rau tus Tswv uas muab tau txojkev zoo siab rau neeg.

d. 1 Vajntxwv 10 haistias, “Tus neeg zoo siab yog tus sawv ntawm Vajtswv.” Ntawv Nkauj 144 haistias, “Cov neeg zoo siab yog cov uas ntseeg Vajtswv ua lawv tus Tswv.” Pajlug 16 haistias, “Tus neeg uas ntseeg tus Tswv yog tus neeg zoo siab.” Yauhas 13 haistias, “Cov neeg zoo siab yogcov ua raws li tus Tswv hais.” 2 Cor 7 haisitas, “Kuv zoo siab rau tus Tswv, rau qhov kuv cia siab tau rau tus Tswv.”

3. Be happy now – and one day at a time:

a. Cov kwvtij, muaj ntau yam tshwmsim los rau peb lub neej peb tsis totaub, muaj tau yam peb ua tsis tau, muaj tau tus neeg lub tswvyim tsis thooj peb, thiab peb kev neej ua tsis yoojyim, txawm yog li no los Vajtswv xav kom peb muaj lub neej zoo siab, peb los peb xav kom peb muaj lub neej zoo siab. Txij thaum Xibhwb Povlauj los ntseeg Tswv Yexus, nws tau raug neeg tsimtxom ntau zaus, tiamsis nws yeej zoo siab heev li qub, nws tsis pub leejtwg tshem tau nws txojkev zoo siab rau tus Tswv tawm mus.

b. Txawm nws raug kev tsimtxom thiab raug kev txomnyem los, Xibhwb Povlauj zoo siab txhua lub sijhawm. Nws tseem ntuas kom cov ntseeg txhua tus zoo siab. Qhov nws ua tau li no yog nws ua li cas? Cov ntseeg nyob sijhawm Vajluskub Qub thiab cov ntseeg nyob txhua tiam tom qab Tswv Yexus yug los ua peb tus Camseej, lawv muaj kev zoo siab vim yog tus Tswv. Qhov ua rau lawv zoo siab txhua lub sijhawm, vim yog lawv paub txog tus Tswv txojkev hlub. Lawv lees haistias lawv yeej tsis totaub txhua yam ntawm lawv lub neej, tiamsis tus Tswv paub. Lawv cia siab rau tus Tswv ua tus pab lawv, lawv cia siab rau tus Tswv ua tus tsomkwm lawv, thiab lawv muab lawv lub neej tso plhuav rau tus Tswv ua tus coj. Lawv yeej tsis tas kev cia siab rau tus Tswv ib zaug li, tiamsis lawv cia siab thiab vamkhom tus Tswv mus li.

c. Cov ntseeg thaum ub lawv tsis yog zoo siab rau qhov uas lawv cia siab rau tus Tswv rau lub neej hauv ntiajteb no xwb, tiamsis ib qhov uas ua rau lawv zoo siab heev yog qhov uas lawv paub haistias yav tom ntej lawv yuav tau mus nrog tus Tswv nyob. Loos 5, Xibhwb Povlauj haistias, “Peb zoo siab thiab vamkhom rau Vajtswv lub koobmeej.” Tshwmsim 19, Yauhas haistias, “Peb cia li zoo siab thiab muab kev hwm rau Nws, rau qhov tus Menyuam Yaj roojtshoob los yuav txog, nws tus nkaujnyab twb muab npaj tiav lawm.”

4. Closing:

a. Cov kwvtij, Phau Ntawv Nkauj hais rau peb li no, “Hnub no yog hnub tus Tswv tsim rau peb, peb cia li zoo siab.” Peb cia li zoo siab rau hnub no, tsis yog zoo siab rau nag hmo losyog zoo siab rau tagkis. Tiamsim zoo siab rau hnub no – zoo siab rau tamsim no. Mathais 6 haistias peb tsis txhawj txog tagkis, rau qhov tagkis los tsis tau txog thiab nws muaj nws teebmeem txaus rau tagkis.

b. Txhua hnub – thaum koj sawv mus txog thaum mus pw, koj cia li zoo siab rau tus Tswv, cia tus Tswv kav koj lub siab, thiaj tsis muaj leejtwg losyog tsis muaj ib yam dabtsi yuav los ua tau rau koj nyuaj siab, txhov siab losyog txhawj, rau qhov thaum ntawd tus Tswv txojkev haumxeeb kav koj lub siab thiab koj tau zoo nyob kaj siab lug. Hnub no koj tso plhuav koj lub neej rau tus Tswv ua tus tsomkwm thiab saib xyuas. Zoo siab thiab txaus siab rau tus Tswv rau txhua yam Nws tau foom rau koj lub neej – zoo siab rau koj tej menyuam, zoo siab rau koj tus pojniam, zoo siab rau koj tus txiv, koj txoj haujlwm, koj tej kwvtij neejtsa, koj tej phoojywg, huabcua, zaub mov noj, ib puas tsa yam koj muaj tamsim no. Zoo siab hlo rau tus Tswv, ua Nws tsaug. Thaum koj lub siab nyob ntawm tus Tswv lawm, koj yuav muaj tau lub neej nrog txojkev zoo siab txhua lub sijhawm.

c. Thov Vajtswv pab kom nej yuav muaj txojkev zoo siab txhua lub sijhawm rau tus Tswv. Asmees.