Cov pobtxha yuav rov ciajsia

Ezekiel 37:1-3,11-14

 

Greetings:  Thov Vajtswv foom koob hmoov rau nej, thiab thov Tswv Yexus txojkev haumxeeb nrog nraim nej txhua tus nyob.  Asmees.

Text:  Ezekiel 37:13-14

Thov Vajtswv:

 

1.         Introduction:
            a.         Puas muaj tej lub sijhawm nyob hauv koj lub neej koj tsis muaj kev cia siab rau leejtwg li? 

 

            b.         Puas muaj tej lub sijhawm koj xav zoo li tsis muaj leejtwg hlub koj, mob siab txog koj losyog care txog koj li?

 

            c.         Tej lub sijhawm koj xav zoo li hais los no, koj ua li cas xwb?

 

2.         Cov Ivxayees zoo li cov pobtxha uas qhuav qhuav lawm:
            a.         Lub sijhawm uas Xibhwb Exekhees nyob, Vajtswv cov neeg Ivxayees tsis mloog Vajtswv lus, Vajtswv thiaj tau cia lawv cov yeebncuab tuaj tua yeej lawv thiab coj lawv mus kaw nyob rau tebchaws Npanpiloos.

 

            b.         Lub sijhawm lawv mus nyob tid, lawv tas kev cia siab rau lawv lub neej.  Lawv xav tias Vajtswv muab lawv txiav tawm ntawm Vajtswv mus lawm.  Lawv tsis muaj kev cia siab haistias lawv yuav rov los pom lawv lub tebchaws thiab yuav rov tau los nyob lawv lub tebchaws.

 

            c.         Lawv zoo li cov cov neeg tuag uas twb muab faus hauv qhov ntxa uas tshuav cov pobtxha uas qhuavqhua lawm xwb.  Lawv zoo li no vim haistias Vajtswv tus Ntsujplig tsis nrog lawv nyob lawm xwb. 

 

3.         Cov tsis ntseeg zoo li cov pobtxha uas qhuav qhuav lawm:
            a.         Cov kwvtij txhua tus, yav thaum ub peb tsis tau los ntseeg Yexus ua peb tus Cawmseej, peb tsis muaj Vajtswv tus Ntsujplig tus Dawbhuv uas muaj txojsia nyob ntev mus tas ibtxhis, peb zoo li cov pobtxha qhuav qhuav uas tsis muaj sia thiab. 

 

            b.         Lub sijhawm ntawd peb yeej tsis muaj nqis dabtsi rau ntawm Vajtswv.  Peb rau siab sib zog ua neej thiab rau siab khawv noj khwv haus heev, tiamsis txhua yam peb muaj thiab peb khwv tau yeej tsis txaus peb lub siab.  Zoo li peb pheej muaj tsis txaus peb lub siab vim haistias peb tsis muaj Vajtswv tus Ntsujplig tus Dawbhuv nyob hauv peb.  Lub sijhawm no cia siab rau leejtwg?  Peb mus cia siab rau Dab thiab peb cia siab rau tej uas cawm tsis tau peb txojsia. 

 

            c.         Yog vim li cas peb ua li no?  Peb ua li no vim haistias peb tsis muaj Vajtswv tus Ntsujplig tus Dawbhuv uas yuav ua rau peb txaus siab rau peb lub neej, yuav ua rau peb rov ciajsia rau ntawm Vajtswv.  Peb lub siab xav nrhiav Vajtswv, tiamsis peb tsis paub yuav mus nrhiav rau qhovtwg, peb thiaj cia siab rau tus yuamkev uas tsis yog Vajtswv.  Yog peb tsis muaj txojkev cia siab rau tus tseem Vaajtswv, peb lub neej yeej tsis kaj thiab peb tsis paub haistias xyov peb lub neej yuav mus kawg rau qhovtwg.  Peb yuav mus nrhiav txhua yam los daws qhov teebmeem, tiamsis peb yeej daws tsis tau.

 

4.         Vajtswv ua rau peb muaj kev cia siab thiab rov ciajsia:
            a.         Tiamsis Vajtswv hais rau Xibhwb Exekhees haistias, “Tus Tswv yuav qhib nej lub qhovntxa thiab yuav tsa nej sawv, thiab tus Tswv yuav coj nej rov mus nyob tebchaws Ivxayees.  Thaum no nej yuav paub haistias Nws yog nej tus Tswv.  Tus Tswv yuav muab Nws tus Ntsujplig rau nej, nej yuav muaj sia, thiab Nws yuav cia nej nyob hauv tebchaws Ivxayees.”  Xyoo 538 B.C. Cov Ivxayees rov los hauv lawv lub tebchaws.

 

            b.         Thaum koj thiab kuv tsis tau los ntseeg Yexus, Vajtswv Txojlus Efexaus 2 qhia rau peb tias peb zoo li cov neeg uas tuag lawm.  Peb zoo li cov Ivxayyes thaum ub lawv nyob tebchaws Npanpiloos.  Tiamsis hnub uas peb los ntseeg Yexus ua peb tus Cawmseej losyog hnub uas peb yug dua tshiab ntawm Vajtswv lub npe, Vajtswv muab Nws tus Ntsujplig tus Dawbhuv rau peb, hnub ntawd Vajtswv zam peb lub txim, thiab Vajtswv rov los ua peb Leejtxiv.  Peb yog Vajtswv cov menyuam.  Vajtswv rov ua rau peb ciajsia.  Vajtswv muab txojkev cia siab rau peb ua neej thiab peb muaj kev vamkhom tias thaum peb ua neej nyob no Vajtswv niaj hnub tsomkwm saib xyuas peb.  Qhov no yog qhov uas peb tus ntsujplig xav tau thiab yog qhov uas tseem ceeb heev rau peb lub neej thiab txojsia nyob hauv ntiajteb no.

 

            c.         Tsis yog li no xwb thaum txog sijhawm Vajtswv yuav coj peb mus nyob hauv Nws lub tebchaws, ntuj ceebtsheej, uas zoo kawg nkaus.  Thaum ntawd peb yuav nrog Nws nyob mus tas ibtxhis thiab ibtxhis li.  Qhov no yog txojkev vamkhom losyog kev cia siab uas zoo tshajplaws Vajtswv muab rau peb thaum Nws tus Ntsujplig los nyob hauv peb lub siab.  Nej sawvdaws muaj Vajtswv tus Ntsujplig tus Dawbhuv thiab nej muaj kev cia siab rau ntawm Vajtswv lawm. 

 

5.         Closing:
            a.         Cov kwvtij txhua tus, tsimnyog peb ua Vajtswv tsaug heev, vim Nws hlub heev li, Nws thiaj ua rau peb rov ciajsia.  Vajtswv niaj hnub nrog nraim peb nyob.  Nws yuav tsomkwm saib xyuas peb mus tas peb sim neej.  Nws yeej tsis pub Dabntxwgnyoog losyog txojkev txhaum kovyeej tau peb lawm.  Peb cia li cia Vajtswv Txojlus tswj peb lub siab thiab qhia peb ua neej, peb thiaj tsis rov poob mus ua txojkev txhaum qhev losyog peb thiaj tsis rov ntxhov siab thaum peb tsis tau los ntseeg Yexus ua peb tus Cawmseej.

 

            b.         Tiamsis peb yuav muaj kev cia siab thiab yuav kubsiab lug ua peb lub neej kom Vajtswv tau koobmeej thiab tau ntsejmuag mus li.  

 

            c.         Thov Vajtswv tus Ntsujplig yuav nrog nraim nej nyob txhua lub sijhawm rau ntawm Tswv Yexus lub npe.  Asmees.