Hlub ntawm dejnum

1 Yauhas 3:18-24 (5/14/2006)

Greetings: Thov Vajtswv foom koob hmoov rau nej thiab thov Vajtswv txojkev haumxeeb los kav nej lub siab rau Tswv Yexus lub npe. Asmees.

Text: 1 Yauhas 3:18

Thov Vajtswv:

1. Introduction:
a. Analogy: A mother has a bad hand.

b. Hnub no yog Mother’s Day, yog ib hnub uas lub tebchaws no pib muaj txij thaum xyoo 1907 los - luag muab teem cia ua hnub rau tej metub menyuam ua koobtsheej nco txog lawv leejniam tej txiaj ntsig losyog kev hlub tu lawv nyob hauv lub ntiajteb no.

c. Kuv cia siab haistias nej txhua tus uas yog menyuam nej yuav hlub nej niam ib yam li tus tub hais los ntawd. Txawm koj niam yuav tsis txawj tsis ntse, tsis zoo li lwm tus thiab yuav ua tsis tau txhua yam raws li koj lub siab xav los, koj nco ntsoov haistias nws yog noj niam, nws yeej hlub koj heev li. Nws yuav ua txhua yam zoo rau koj, nws yuav txhawb koj thiab nws yuav tu thiab saib xyuas koj mus txog hnub uas koj muaj cuab muaj yig thiab tau lub neej zoo lawm. Txawm yog li ntawd los nws tseem hlub koj heev li, vim koj yog nws ib tug menyuam!

d. Koj puas hlub koj niam? Txojlus qhuabqhia hnub no muaj lub npe hu haistias, “Hlub ntawm dejnum.” Yog koj hlub koj niam, tsis txhob hlub ntawm lo lus xwb, tiamsis koj yuav tsum hlub los ntawm dejnum thiaj yog koj hlub koj niam tiag tiag.

d. Vajtswv Txojlus haistias, “Menyuam, nej yuav tsum hwm nej niam nej txiv, nej thiaj muaj sia nyob ntev thiab nej thiaj tau zoo nyob kaj siab lug hauv lub ntiajteb no. Thiab, Vajtswv Txojlus hais ntxiv tias nej yuav tsum tsis txhob muab nej niam tej lus qhuabqhia povtseg. Tus neeg uas ua rau nws niam chim losyog tu siab yog tus neeg ruaj. Pajlug 30 haistias tus menyuam uas tsis mloog nws niam lus, nws ob lub qhovmuag yuav raug dav rho tawm thiab uablag yuav noj nws ob lub qhovmuag.” (Ex. 21; Pr 6; 10). Lo lus kawg no yeej hais meejmeej tias yog tus menyuam twg tsis muaj kev hwm nws niam, tus uas yug nws los hauv ntiajteb no, nws yeej tsis tsimnyog ua neeg nyob ntxiv lawm – lo lus no yog ib lo uas hais tau mob kawg nkaus; tiamsis nws yog ib lo tseem ceeb heev li. Nej yog metub menyuam, nej yuav tsum muab nej niam saib rau nqis, hwm nej niam, mloog nws lus thiab ua zoo rau nws, Vajtswv thiaj foom koob hmoov rau nej. Vajtswv txwv tsis pub menyuam ua phem rau niam thiab rau txiv. Hnub no yog ib hnub uas nej txhua tus uas yog menyuam, thiab peb cov laus uas tseem muaj niam nyob peb, yuav tau qhia rau peb niam haistias peb hlub lawv; peb yeej hwm lawv, peb yeej nco ntsoov lawv tej lus qhuabqhia dhau los ntawm dejnum. Hnub no koj ua ib yam dabtsi zoo pub rau koj niam!

2. Do not just love in words and tongue but action:
a. Vajtswv Txojlus 1 Yauhas 3 hnub no ntuas peb cov ntseeg kev ua neej haistias, “Nej tsis txhob hlub ntawm lo lus thiab tus nplaig xwb, tiamsis hlub dhau los ntawm dejnum.”

b. Peb cov Hmoob muaj ib txhia nyiam hais lus zoo, tiamsis tsis muaj dejnum zoo. Muaj ib txhia neeg lawv nyiam hais lus qabzib kom neeg qhuas lawv, tiamsis tsis muaj dejnum zoo. Vajtswv ntuas kom peb cov ntseeg Yexus tsis txhob ua neej zoo li no! Vajtsw Txojlus haistias peb yuav tsum hlub los ntawm dejnum. Qhov no thiaj yog txojkev hlub tiag tiag:

1). Vajtswv Txojlus hais kom cov ntseeg uas yog ib tsevneeg rau ntawm Vajtswv yuav tsum sib hlub los ntawm dejnum, tsis txhob yog hais lo lus xwb.

2). Peb yog Vajtswv cov menyuam peb yuav tsum zoo siab hlo siv peb tej tswvyim, siv peb lub sijhawm thiab siv peb tej nyiajtxiag, uas Vajtswv foom pub rau peb, los mus sib pab ua Vajtswv tej dejnum ntawm lub siab dawbpaug, tsis txhob yog hais lo lus xwb.

3). Muaj ib cov ntseeg lawv tseem ua lub neej zoo li qub, lawv hais lus heev, tiamsis thaum txib ua dejnum lawv yig heev. Thaum pawg-ntseeg thov kom pab ib yam dabtsi, lawv tsis kam pab. Qhov no txhais tau haistias lawv tsis tau muaj kev hlub raws li Vajtswv hais ntawm dejnum thiab zoo li ib tsevneeg rau ntawm Vajtswv.

4). Peb yuav tau thov Vajtswv pab peb tiag tiag kom peb sib hlub los ntawm dejnum, es tsis txhob hais lo lus zoo xwb. Thaum twg yog pawg-ntseeg txib koj ua ib yam dabtsi, koj haistias, awb, cia kuv mam ua. Zoo siab hlo ua. Qhov no thiaj yog sib hlub ntawm dejnum! Tsis yog li no xwb, Vajtswv Txojlus tseem hais ntxiv haistias, “Txhua yam peb ua peb ua zoo li yog ua kiag rau tus Tswv ntag.” Qhov no txhais tau haistias txhua yam peb ua peb yuav tsum ua kom zoo tshajplaws – vim koj thiab kuv yog Vajtswv cov menyuam zoo tshajplaws. Vajtswv tsis pub peb tubnkeeg. Nyob hauv peb tsevneeg yog peb sib hlub ntawm dejnum, peb tsevneeg yuav zoo. Nyob ntawm peb pawg-ntseeg yog peb sib hlub ntawm dejnum, Vajtswv yuav foom koobhmoov rau peb.

Analogy: Vietnamese lazy son!

c. Vajtswv Txojlus haistias cov ntseeg yuav tsum xyaum Vajtswv tus qauv ua neej. Vajtswv tsis yog lam haistias Vajtswv hlub peb xwb, tiamsis Vajtswv ua dejnum rau peb kiag. Vajtswv txib Vajtswv tus tub Yexus los tuag txhiv peb lub txim. Vajtswv tseem niaj hnub tsomkwm saib xyuas peb thiab pub rau peb muaj noj muaj haus thiab tau txais koob hmoov ntau yam rau peb lub neej. Tej no qhia rau peb haistias Vajtswv hlub peb dhau los ntawm dejnum. Peb yog Vajtswv cov menyuam, Vajtswv hais kom peb ua neej ib yam li Vajtswv ua rau peb, peb tsis txhob hlub ntawm peb lo lus thiab peb tus nplaig xwb, tiamsis peb yuav tau sis hlub dhau los ntawm dejnum.

3. Christ’s command:
a. Vajtswv Txojlus qhia ntxiv rau peb haistias peb yuav tau ua lub neej ncajncees, ncajncees raws li Vajtswv Txojlus hais, tsis yog ncajncees raws li peb lub siab xav losyog raws li ntiajteb txojkev ncajncees. Tus ntseeg uas hlub tibneeg ntawm dejnum thiab ua ncajncees raws li Vajtswv hais, Vajtswv Txojlus haistias nws ua neej kajsiab lug. Tiamsis tus uas tsis ua raws li Vajtswv hais, nws lub siab yuav rau txim rau nws, vim nws ua tsis ncaj thiab nws ua tsis raws li nws yog Vajtswv ib tug menyuam.

b. Tsis tas li no xwb, Vajtswv Txojlus qhia ntxiv haistias, “Yam uas Vajtswv hais kom peb ua yog peb yuav tau ntseeg Yexus thiab peb yuav tau sib hlub - cov uas mloog Nws lus uas yog ntseeg Yexus thiab sib hlub, Vajtswv nyob hauv lawv thiab lawv nyob hauv Vajtswv.” Cov kwvtij, cov lus no tseem ceeb kawg nkaus! Thaum peb ua kevcai ntxuav losyog los ntseeg Yexus ua peb tus Cawmseej, Vajtswv thiab peb koom uake just like in marriage – Two are one and we are one with God! Yog li no, thaum dejnum zoo tsis tawm ntawm peb los ces nws qhia tau haistias Vajtswv tsis nyob hauv peb, vim haistias Vajtswv tsis ua dejnum phem, Vajtswv ua dejnum zoo xwb.

c. Cov kwvtij txhua tus, Vajtswv Txojlus xaus li no hais txog peb noobneej kev ntseeg thiab kev ua neej nyob hauv lub ntiajteb no: 1). Hais txog kev ntseeg ces nws tsuas muaj ib txojkev ntseeg xwb, ntseeg Yexus xwb thiaj yog qhov tseeb thiab Yexus thiaj cawm tau peb dim peb lub txim, tes dejnum no Yexus twb muab ua tiav rau peb lawm – dhau ntawm Yexus mus lawm no one else can save us. 2). Hais txog cov ntseeg txoj kevcai ua neej ces yog txojkev sib hlub xwb, dhau txojkev sib hlub lawm yeej tsis muaj ib yam dabtsi yuav haum Vajtswv siab, tiamsis txojkev sib hlub yuav tsum yog hlub ntawm dejnum tsis yog hlub ntawm lo lus xwb.

d. Hnub no thov Vajtswv foom koob hmoov rau nej txhua tus thiab thov Vajtswv pab kom peb yuav muaj kev sib hlub ntawm dejnum. Asmees.